Наргиз Гюлечова
9-пи майди Каспийск шагьрин кьялан майдандиин Ватандин Аьхю дявдин Гъалибвалин 81-пи йис хьпаз бахш дапIнайи парад кIули гъубшну. Параддиз вахтназ вуди Дагъустандин главайин вазифйир тамам апIурайи Федор Щукин, Дагъустандин Правительствойин председателин вазифйир вахтназ вуди тамам апIурайи Мягьямад Рамазанов, республикайиъ имбу Ватандин Аьхю дявдин шубур ветеранарикан сар Муса Багьаутдиинов ва хайлин жара гьюрматлу хяларра дуфнайи.
Аьдат вуйиганси, парад Гъалибвалин пайдагъ гьатIабццбалан ккебгънийи. Каспийсдиъ параддиз уч духьнайидар Москвайин Уьрю майдандиин гъябгъюрайи параддиан вуйи трансляцияйиан душваъ иштирак шулайи Урусатдин Президент Владимир Путиндихъ хъпехънийи. Президентдин улхбан кьяляхъ, параддиъ иштирак шулайидар, Ватан бадали чпин жанар туву эскрарин гьюрмат уьбхюри, саб дакьикьайиъ ккебехъну дийигънийи. Хъасин, Урусат Федерацияйин ва Дагъустан Республикайин гимнар гъивнийи.
Каспийскдин майдандиина параддиз лигуз уч духьнайидар Ватандин Аьхю дявдин Гъалибвалин 81 йис хьпахъди тебрик апIури, Федор Щукин трибунайихъан улхуз хъюгънийи.
Чан улхбаъ дугъу гъапиганси, му машквар наслар сатIи апIури, жвуван Ватандиинди дамагъ апIру машквар ву.
«Гъийин Гъалибвалин йигъ Урусатдин тарихдиъ айи варитIан асас машквар ву. Йисар гъягъюри ашра, думу вахтар саринра гьич кIваълан гъягъюрдар. Гьар йисан 9-пи майди гьарсар касдин кIваъ Гъалибвалин манишин шула ва гьарури ихь Ватан фашистарихьан азад гъапIу игитариз чухсагъул кIура. Дявди дерд тутруву гьич саб хизанра имдар. Гъи ухьу гъалибвалиин шадди ашра, ихь юкIвариъ, дявдиан кьяляхъ дарфи эскрар кIваин апIури, пашманвалра айихь. Дурар вари уьмурлугъ ихь кIваинди гъузди», – гъапнийи Федор Щукинди.
Республикайин кIулиъ айири Ватандин Аьхю дявдиъ гьунарар улупу дагъустанлуйириканра гъапнийи. Гьадрарин арайиъди Совет уьлкейин Игит Аьгьмет-Хан Султан, подводник Мягьямед Гьяжиев, гьюлерин летчик Юсуп Акаев ва истребительный полкнан командир Валентин Эмиров кIваин гъапIнийи.
Гьацира Федор Щукинди гъи хусуси метлеб айи дявдин операцияйиъ иштирак шулайи эскрариз, дурарин хизанариз чухсагъул мялум гъапIнийи.
Щукиндин тебрикнан гафарин кьяляхъ майдайдиин парадный расчетар гъягъюз хъюгънийи. Парад кIули гъубхур Уьру пайдгъин лишниккди вуйи Каспийский флотилияйин командующийин заместитель, контр-адмирал Анатолий Долгов, хъа парад кьабул гъапIур Каспийский флотилияйин командующий Олег Зверев вуйи.
