Умгьанат Сулейманова
Ноябрин аьхиримжи йигъари Дербент райондин администрацияйин кIулиъ айи Мавсум Рягьимовди хайлин йисари гъулан мяишатдин артмиш’вализ дерин фикир туврайи, гьясиллувалиъ ужудар натижйир гъазанмиш апIури, лайикьлу зегьмет зигурайи агьалйириз гьюрматнан грамотйир тувну. Дурарикан сар ихь ватанагьли, Дербент райондин Карл Марксдин ччвурнахъ хъайи гъулаъ тIумтIин багълар кивну, тIумутI гьясил апIурайи арендатор Къудрат Мягьрамов (шиклиъ гагвлахъанди сарпир) ву. Дугъаз, тIумутIчивалин циркил артмиш апIбаъ баракаллу зегьмет зигбаз ва заан хъуркьувалар улупбаз лигну, гьюрматнан грамота тувну. Дербент райондин УАПК-йин управлениейин кIулиъ айи Юсиф Герейхановди, Къудрат Мягьрамовдин ляхниз заан кьимат тувуб дюзиб вуйивал субут гъапIну.
«Узуз 2009-пи йисхъанмина аьгъю кас вуйиз. Думу вахтна тазади багълар киврайи хусуси арендаторар хайлиндар айи. Республикайиъ тIумутIчивалин циркил лап зяифди вуйи. Гьюкуматдин терефнаан циркил артмиш апIуз зат кюмек туври гъабхьундар. Гьадму варитIан читин вахтна Къудратди Карл Марксдин ччвурнахъ хъайи гъулаъ 5 гектариин тIумтIин багъ кивнадайи.
Гьаму цирклиъ бина ккивайиз, Къудратди лазим вуйи техника кредитдиз масу гъадабгънийи. ТIумтIин багълар хусуси арендайиз гъадагънайидари, техника адарди, чпи планламиш дапIнайи кьадар ккадабцIуз даршлуган, дурар Къудратдихьна илтIикIури ва гизафси дугъан техника ишлетмиш апIури гъахьну.
Аьхю чухсагъул дугъаз. Гизаф гьевескар ву. Дугъу, Дербент райондин Чинар, Рубас, Хазар, Билгьяди гъуларин, хайлин йисари тартиб дарапIди, чIуру укIари ккапIну дирчнайи жилар, сад-кьюд йисандин арайиъ лазим вуйи къайдайихъна гъахну. Дугъу киврайи тIумтIин багъдин бегьерин кьадарра йислан-йисаз артухъ шулайиб рябкъюра», – гъапнийи Герейхановди.
Кьудрат Мягьрамов Хив райондин ГъуштIил гъулаъ 1967-пи йисан аьхю хизандиъ бабкан гъахьну. Мектеб ккудубкIну, 1985-пи йис’ан 1987-пи йисазкьан дугъу эскервалин гъуллугъ апIуру. Армияйиан гъафи Мягьрамовди, чан зегьметнан жилгъа Кизляр райондиъ жюрбежюр гъуллугъарилан ккебгъру. Гьадму арайиъ думу Мягьячгъалайиъ машинарин ва рякъярин институтдиъ урхуз учIвру. 2012-пи йисланмина гъийин йигъазкьан думу «Мягьрамов» КФХ-йин мяишатдин регьбер ву.
Кьудрат Мягьрамовди 14 йисандин арайиъ тIумутIчивал артмиш апIбан бадали хайлин дакьатар харж дапIна. Дугъу зигурайи марцци зегьметнан натижйирра гьар йисан ужудар ву. Кьюб гьяфта улихьна Мягьячгъалайиъ гъулан мяишатдин ва тартиб апIру промышленностдин гъуллугъчйирин йигъаз бахш дапIнайи ярмарка кIули гъубшну. Душваъра РД-йин глава Сергей Меликовди Къудрат Мягьрамовдиз гьюрматнан грамота тувну.
