Мейлан Нежефов
Хив райондин ТИК-дин председатель Фридман Асваровди, райондин мектебариз гъягъюри, 10-11-пи классариъ урхурайидарихъди Урусатдин ва Дагъустандин конституцйирин ва къанунарин гьякьнаан ачухъ дарсар гъахура.
ТИК-дин кIулиъ айири къайд гъапIганси, райондин 35 УИК-диъ сечкйир саб жюрейинра камивалар адарди, хъа анжагъ гьарган агьалйири маракьлувал улупури, дурарин заан иштирак’валиинди кIули гъя-гъюра. Закурин насларикан райондиъ шибритIиинди ипнайи аьдат чIур дарапIуб ккун апIури, Фридман Асваров баяр-шубарихьна илтIикIнийи.
– Сечкйириъ иштирак шулдарча, УИК-диз учу дурушишра, сес чпи тувнашул ва жара гафар-чIалар апIрудар гъи ихь арайиъ цIиб адар. Учвуз дурар гьич саб вахтнара нумуна духьну ккундар. Жвуван Ватандикан кIваъ хиял адарди, закурин йигъкан фикир дарапIди ва дидхъан юкIв дурубгри лицуз фици шулу? Ари гьаму суалар гьарури учву ичв улихь дивну ккун.
Вахт сикинуб дар. Интернетдихьан ярхла духьну, дарсариз фикир тувай. Закур швумал гъахьну кIури, кьан хьибди. Гъул’ан урхуз гъушиган, шлихъди вушра дуствал ккебгъуз гьялак махьанай. КучIал, футна апIру ксар учвхьан вархиди гъитай. Ичв гьарсаб алдабгъру ликрин кIулихъ апIру гафназ фикир тувай. Ичв абйир-бабарин ва веледарин кьисмат гьарсар касдин сесналан ва фикрилан асиллу ву. Ватандин гъуллугънаъ хьуб ва къанун заан дережайиинди уьбхюб дагъустанлуйирин, иллагьки ихь халкьдин ифдиъ а. Думу гьаци вуйиб сабсан ражну ачухъди Урусатдин яракьлу кьувватари Украинайин жилариин гъабхурайи хусуси метлеб айи дявдин операцияйиъ имбу халкьартIан кьюбдри артухъди иштирак шулайи ихь кьягьялари субут апIура. Вари терефарихъанди халкьдин баркаллу шил намуслувалиинди уьбхюб ва давам апIуб ичв гъюнариинра ал, фикир апIинай, – гъапнийи Ф. Асваровди.
– СВО-йиъ ихь баяр гизаф а гъапи вахтна, учу миллетчйир ву пну, фикир мапIанай. Мидкан ашкарди улхувалин метлеб гьадму вуки, чпин аьзиз жанарилан хил алдабгъну, ватандиз ва къанундиз вафалувалиинди гъуллугъ апIурайи ихь игитариинди ухьу дамагъ апIури ккунду. Учвканра апIурайи тIалаб гьадму вуйич: ихь дирбаш халкьдиз ва учв абйир-бабариз закурин йигъан гаф гъюруб ва кIул мухриъ ипруб мапIанай, – ТИК-дин председателин гафар му идарайин секретарь Тельман Агъабалаевдира тасдикь гъапIнийи.
