Мейлан Нежефов
Мектебариъ урхурайидар хьадан шубуб вазлин тятIилариз деетну, дурариз гъийин йигъхъантина гизаф архаинвал айиган, чIат-чIурдиъ чIуруб апIбахьан уьрхюз чарйир агури, Хив райондин мистариъ – Аллагьдин хулариъ – исламдин дарсар кивуз хъюгъна.
Мидин гьякьнаан узу райондин имамарин Советдин председатель Шябан-гьяжи Салигьовдихьна ил-тIикIнийза. Дугъу гьамци кIура: «Му жюрейин ляхин учу сачра кIули гъубхунча. Аьгъювалар гъадагъуз гьич саб вахтнара кьан дар. Урхурайидар тятIилариз деетайизра, сачдин учу гъубху ляхин ццира кьувватнаъ имидуш, абйир-бабар суракьнаъ гъахьнийи. Кьадарсуз шад вуза му ляхниин. Му жавабдар ляхниъ сач машгъул духьну зегьмет гъизигу мусурман чвйир-чйириз сабсан ражну чухсагъул мялум апIуз ккундузуз. Гъит Аллагь рази ишри чибкан. Амин!
Гьаз райондин агьалйирин уч’ин мициб хъугъвал алш, дидканра кьюб келима кIарзавуз. Урхбан йисандин эвелиан аьхириз учу мектебариз гъягъюри, мялимарихъди сабси аьхюр-аьхюрси, бицIир-бицIирси дидисну ккуниваликан, гъирагъдилан гъафи инсанар гюзет апIуваликан, дурарихьна вуйи гьякь-гьюрматнакан, аьдатарикан, чIурубдихьан ярхла хьуз, убхърубди ва зиг-рубди инсандин уьмур ужударстар чагълариъ айи вахтна кьатI апIурайибдикан, кучIал-футнайи инсанарин ара мичIал апIурайибдикан, кучIлин манзил ярхлаз дурубшрубдикан дарсар кивунча. Гьадму дарсар давам апIуз ният айич гьамусра. Дарсар киврудар гъуларин имамар, гьадрарин уьмрин юлдшар ва Дагъустандин исламдин университетдин студентар хьиди. ИкибаштIан, дарсар гьарсаб гъулаъ чан мистаъ кIули гъягъиди. Дин-тIяаьтнан ва насигьятнан дарсар туврудар баяриз жилижви, хъа шубариз – дишагьли хьиди. Аьхириъ, саки вари райондин гъулариан кIубнидарстар баяр-шубар райондиъ кIули гъябгъру конкурсдиъ иштирак хьиди. Гъит, кIубанур гъалиб ишри! Конкурсдин натижйириинди гъалиб гъахьи урчIвур кас гьюрматнан кагъзариинди, велосипедариинди ва жара пешкешариинди лишанлу апIиди.
