Зубайдат Шябанова
Июндин 1-пи йигъан Хючна гъулаъ Кьалухъ Мирзайин ччвурнахъ хъайи спортдин дараматдиъ Варихалкьарин бицIидар уьрхбан йигъаз бахш вуйи шадлугънан серенжемар кIули гъушну. Дина хусуси метлеб айи дявдин операцияйиъ кечмиш гъахьи ва мобилизацияйиъ айи эскрарин бицIидариз, касиб хизанариан вуйи ва Сирияйиан адагъну гъахьи баяр-шубариз теклиф гъапIнийи.
Серенжемдиъ Табасаран райондин глава Мягьямед Къурбанов, РД-йин Халкьдин Собраниейин депутат Алавудин Мирзабалаев, Табасаран райондин КЦСОН-дин кIулиъ айи Тимур Аьлиев ва жарадар иштирак гъахьну.
Табасаран райондин глава Мягьямед Къурбановди, баяр-шубар машкврахъди тебрик апIури, гьамци гъапнийи: «Гъи гьаму мяракайиъ ихь арайиъ ватандин сабвал ва азадвал уьбхюрайи абйирин ва гъардшарин баяр-шубар а. Узу учвуз ичв абйир гъалибвал гъадабгъну, сагъ саламатди хулаз дуфну, гъюру йисан му машквар дурарихъди сатIиди къайд апIуб ккун апIураза. Гъит ихь ватандиъ гьаммишан ислягьвал, уьмриъ шадвал, уж’вал ва сагъвал ибшри. Аку, бахтлу ва шаду байвахтнан эйсйир ишричву!».
Серенжемдиъ Мягьямед Къурба-новди ихь машгьур меценатар Айваз Рамазановдиз ва Низами Абасовдиз машквар тешкил апIбаъ спонсорвалин кюмекназ Чухсагъулин кагъзар тувну.
Ич сюгьбатнаъ Айваз Рамаза-новди къайд гъапIганси, дугъан кюмекниинди Табасаран райондиъ Варихалкьарин бицIидар уьрхбан йигъаз тялукь машквар тешкил апIури, цци 16-пи раж ву.
«2009-пи йисан гъубху сабпи машквар гъиси кIваин илмийиз. Думу ухьуз Дагъустандин региондин жямяаьтлугъ «Табаристан» фонд айи вахтна тешкил гъапIнийча. Думуган ва дидин кьяляхъ хайлин йисари Табасаран райондианси, Хив ва Дербент районарианра 200-250-рихьна майиф бицIидар, уьмрин гъагъи аьгьвалатнаъ ахьнайи касиб хизанарин баяр-шубар уч апIури, кьюб-шубуб жюрейин мани хурагар, меълишнар гьиври, пешкешар туври ва концертдин программа улупури гъахьунча. Йисандин мудатнаъ саб гьаму машквар ваъ, узу улихь гьучIвну, ихь театрин, табасаран ватандашарин кюмекниинди, асккан гьисаб 4-5 серенжем гъахури шулача.
Гьаму ражарин серенжемдиъ иштирак шулайи 210 бицIириз пешкешар тувунза, гьадму гьисабнаан табасаран чIалнан алфавитдин плакатарра», – гъапнийи Айваз Рамазановди.
Серенжемдиъ иштирак шулайи бицIидарин ва дурарин бабарин терефнаан чан фикрар ич сюгьбатнаъ Табасаран райондин «Бабарин дих» жямяаьтлугъ тешкилатдин регьбер Армине Аьбдуризаевайи ачухъ гъапIнийи:
«Гьар йисан бицIидар уьрхру йигъаз Табасаран райондиъ ихь меценатарин, райондин администрацияйин ва КЦСОН-дин кюмекниинди, маракьлу серенжем тешкил апIуб ужуб аьдат дубхьна. Цци думу серенжемдиъ 500-дихьна бицIидар иштирак гъахьну. Узу думу машквраз хусуси метлеб айи дявдин операцияйиъ кечмиш гъахьи йиз балин шурахъди душнайза.
Кьалухъ Мирзайин ччвурнахъ хъайи спортдин дараматдин фойейикк бицIидари гъизигу шикларин выставка тешкил дапIнайи. Выставкайихьан тинаси шашкйириан мастер-классар улупуз шубуб стол гьязур дапIнайи.
Серенжем лап маракьлуди кIули гъубшну. Райондин кIулиъ айидар ва дуфнайи хялар удучIвну улхбан кьяляхъ, концертдин программа улупну. БицIидари, гьарсаб мяълийихъди удучIвури, ялхъвнар апIури гъахьну. Хъа Табасаран драмтеатрин артистари дивнайи спектакли бицIидарин гьевес лапра ачухъ гъапIнийи. Серенжемдин тешкилатчйири гьарсар бицIириз саб аьхю пакет меълишнар, вари иштиракчйириз мороженое ва пилав аш тувнийи. Пешкешар айи гьарсаб пакетдиъ гъюдли бамбагсиб кагъзигъян гъибиржнайи багълама айи. Варидари думу фу вуйкIан кIури, фикир апIури гъахьну. Хулаъ учу думу гъюдубчган, табасаран чIалнан алфавитдин плакат вуйи. Йиз худлиз пешкешарикан варитIан гьадму алфавит кьабул гъабхьну. Магьа гьамусяаьтра думу, ич гъуншдин шурахъди сатIиди алфавитдин гьярфар текрар апIури, деъна. Вари бабарин ва бицIидарин терефнаан му серенжемдин тешкилатчйириз аьхю чухсагъул пуз ккундузуз», – гъапнийи Армине Аьбдуризаевайи.
Серенжемдин дахилнаъди «Учу Урусатдин вакилар вуча» акцияра кIули гъубхнийи. Райондин главайи швнур-сар жигьилин хилиъ чпин сабпи паспортар ивну.
