Мейлан Нежефов
Хив райондин гъуларин аьгьвалат ахтармиш апIури, нубатнан ражари узу Ургъарин сельсоветдин кIулиъ айи Тельман Гьюсейновдихьна илтIикIнийза. Ич арайиъ гъабхьи маракьлу сюгьбат исихъ туврча.
– Тельман Къурбанович, уву кIули дийигънайи гъулан администрацияйин гьякьнаан кьюб келима йипа.
– Ургъарин сельсоветдиз хьуб гъул дахил шула: Атрик, ХурсатIил, Ургъа, ВертIил ва Фурдагъ. Гьяйифки, гъийин йигъаз Атрикарин гъулаъ саб хозяйствокьан амдар, хъа ХурсатIилра имбур сар Аьлимягьямед халу ву. ВертIил 12 хизан а, Фурдагъ – 20, Ургъаъра – 26. Багъри гъул фукьан ширинди ва такабурди ебхьударинхъа! Иллагьки гъи гъулхьан ярхлаъ ади, хъа байвахтнан йисар гъулариъ гъушдариз. Дустар, ичв баяр-шубариз тятIилар имиди гъачай гъулариз. Хьаднукьан рягьятвал багъри гъулариъ гъадабгъай. Жандик гъулан гьава кубкIай.
– Гъи гъулаъ айи агьалйирин фу кесп апIури, фит’инди мадар ву?
– Гьелелиг гъулаъ дуланажагъ хъапIрайидарик нежбервалин аьшкь кми. 300-дихьнакьан аьхю малар, гьаци чарвйир ва кIарар, кIирхъарра а. Сари йиккухъди, кьюр-шубури арфар уьрхюри, йиччв масу туври, бицIи машинарихъди инсанар ахури-хури, гъулариъ туканар тIаъну ариш-вериш апIури, гъул’ан саб бицIи вахтназ душну гъирагъдиз, дилихну, чпиз кьюб кепек апIурайидарра а. Мидланра савайи, техперсоналра гьисабназ гъадабгъиган, 40 кас Ургъарин уьмуми мектебдиъ, 4 кас Ургъа ва Фурдагъ ФАПариъ, 3 кас Ургъа почтайиъ, 3 кас Фурдагъ культурайин хулаъ, 4 кас администрацияйиъ, 2 кас ВертIил ва Ургъа гъуларин библиотекйириъ, 11 кас Ургъа ва Фурдагъ халачйир гьясил апIури лихура.
– Рякъярин, штун ва зирзибилин суалар фици гьял апIуз чарйир агурачва?
– Яв суалназ жаваб туври, администрацияйин шубиб гъуларин агьалйиризра чухсагъул пуз ккундузуз. Му учIру суалариъ дурар вари сабхилди кюмек шулазуз. Йиз аьхю бахт вуйиз инсанар узухъди, узу дурарихъди сир-мясляаьтнаъ айивал. Ляхниъ алахьурайи бизарвалар гъулайди гьял апIурача. Гьаци, агьалйирин кIубанвалиинди варидарин икриъ гъи шид а гъапишра, узу гъалатI даршул. Зирзибилин гьякьнаан кIуруш, гъулан зиихъ инсанариз ва мал-къарайиз манигъвал дару йишв улупну, гьадина гъабхури, цIа йивури, убгури, хъа миди вуйиб ичIаъ абхьри магьа гьамус швнуд-сад йис вуйич. Рякъярин гьякьнаан гъапиш, ГъуштIил-Ляхла-Фурдагъ гъулариансина асфальт ккубзри, расвалин ляхнар гъахура. Хъа гъуларин рякъяр гьар йисан трахтурихьди алцIахури, кIекIел абхьри шулча. Амма аьхю мархьари дурар хъана цIийикIултIан айи гьялназ хура.
– Хусуси метлеб айи дявдин операцияйиъ гъалиб хьпан бадали администрацияйи фициб ляхин гъабхура?
– Контракт дибикIнайидар, мобилизацияйин дахилнаъди духнайидар ва чпин хушниинди душнайидар вари гьисабназ гъадагъиган, ич администрацияйиан 50 касдилан зиина гъи Урусатди Украинайиъ гъабхурайи хусуси метлеб айи дявдин операцияйиъ иштирак шула. Гьяйифки, дурарин дестейиан Альберт Сефербегов, Шихяли Шихялиев ва Гьяжимурад Фарзялиев талаф гъахьну. Гьар ражну райондиан хътапIурайи гуманитарный гъагънак ич хусуси пайра ка. Гъит баяриз дидкан дарман ибшри. Администрацияйин терефнаан дурарин багахьлуйириин улукьуб ва алахьурайи читин суалар гьял апIуб гъи йиз вазифйирикан саб вуйиб гьисабназ гъадабгъури, дурарин гъайгъушнаъ ади шулза.
–Интервью тувбаз чухсагъул, Тельман Къурбанович. Ичв администрацияйин агьалйирикан уву разиди, увкан агьалйирра разиди гъузри.
