Наргиз Гюлечова
18-пи ва 19-пи октябри Мягьячгъалайин Пушкиндин ччвурнахъ хъайи кючейиъ гъулан мяишатдин сурсатарин республикайин ярмарка планламиш дапIна. Дидин тешкилатчйир Дагъустандин Правительство, РД-йин гъулан мяишатдин ва ипIру-убхъру сурсатарин министерство ва Мягьячгъала шагьрин администрация ву.

Му ярмаркайиъ чпин гьясил апIурайи сурсатар хьади Дагъустандин вари муниципалитетар иштирак хьиди. Гьадрарин арайиъ Табасаран райондиан вуйи мяишатарра а.
Къайд апIуб лазим вуки, гъулан мяишатдиъ гьясил гъапIу сурсатарин ярмаркйир гьар йисан швнуб-саб ражари республикайин министерствойин кюмекниинди тешкил апIура. Дидин асас метлеб, нежбрари гьясил гъапIу сурсат дабхъну гъурубзри кIури, янаки, базрариътIан исккан кьиматназ вушра, масу тувуб ву. Ярмаркайиз мяишатари хурайи вари сурсатар дарман кадрудар, марццидар ву.