Наргиз Гюлечова
Арфачивал
Гьаму йисан Дагъустандиъ гъулан мяишатдин арфачивалин циркил артмиш апIуз республикайин бюджетдиан 10 миллион манат жара дапIна. Думу дакьатар субсидйир жюрейиинди туврайидар ву. Циркил артмиш апIурайи касари туврайи субсидйир гъадагъбан бадали вуйи аьрзйир мартдин вазли министерствойиъ кьабул апIуз хъюгъди кIури, региондин гъулан мяишатдин ва ипIру-убхъру сурсатарин министерствойин пресс-гъуллугънаан хабар тувра.
Му метлебариз жара дапIнайи дакьатар асас вуди йиччв гьясил апIру мяишатариз гизаф кьадар йичв хру арфарин хизанарин жинсар цIийи алауз, йичв апIру гьаму деврин ужудар алатар ва хъанара жара лазим вуйи шей’ар масу гъадагъуз туврайидар ву.
Къайд дапIну ккундуки, ццийин йисан эвелариз вуйи улупбариинди, Дагъустан Республикайиъ 5 агъзур касдиз арфарин мяишатар а. Йисандин арайиъ дурари ккадабцIурайи йиччвун кьадар саб йишв’инди гьисаб гъапIиш, 1 агъзур тоннатIан артухъ шула.
Агротуризм
Гъулан мяишат артмиш апIурайи республикайин 7 карханайи, «Агротуризм» программайиъ иштирак духьну, 65 миллион манатдин грантар гъадагъну. Агротуризм, асас вуди гъулан мяишат артмиш апIурайи касариз вуйи программа ву. Программайиъ иштирак шулайи мяишатари, чпи тамам апIурайи ляхнихъди республикайиз гъюрайи туристар таниш апIувал себеб вуди, дуфнайи хялар чпихь гъузруганси, мяишатар лазим вуйи вари шараитарихъди тямин апIура. Программайиъ иштирак гъахьи мяишатарикан 6 мяишатдиз – 10 миллион, хъа сабунубдиз 5 миллион манат жара дапIна. Думу дакьатарихъ мяишатари 20 модульный хулар тикмиш апIиди.
Грантар гъадагъу мяишатарин арайиъ Табасаран райондин «Цанакский» СПК-ра а. Мяишатдин директор Низамутдин Небиевди туву мялуматариинди, мициб программа айибдикан хабар гъабхьибси, дугъу сач майдин вазли лазим вуйи вари документар ва проект гьязур дапIну, конкурсдиъ иштирак хьуз министерствойиз аьрза тувну.
«Цанакский» СПК 2000-пи йисхъанмина либхурайиб ву. 2007-пи йисан мяишат йиз хиликкна гъадабгъну, лихру йишвар ачмиш апIуз хъюгъюнза. Ич мяишат асас вуди хутIлариъ дяхнар урзури, рузи ккадабцIувалиин, йимишар гьясил ва тIумтIарин гъелемар битмиш апIбиин машгъул ву.
Мяишат яркьу апIуб ва жара проектарра уьмриз кечирмиш апIуб себеб вуди, гьамусяаьт хъанара артухъди жилар ишлетмиш апIуз кIури, гьязурлугваларин ляхнар гъахурача, душваъ мал-къара, пеъ-шюхъ артмиш апIуб планариъ айич.
«Агротуризм» программайиъ иштирак хьуб’инди, ич мяишатдиз 10 миллион манатдин грант тувну. Думу дакьатарихъ ич йимишарин багъдиъ 4 модульный хулар дивну, райондиз гъюрайи туристар гьадму хулариъ гъузруганси ляхин албагуз ккача. Мидланра гъайри, хулар диврайи йишван багахь марцци штун дагарра хьибди. Дуфнайи хялари мянфяаьтлуди вахт гьапIруганси, жара майднарра гьязур апIидича.
Гьаму жюрейин ляхнар кIули гъахури, республикайин гъулан мяишатдин цирклиъ ужудар хъуркьувалар улупбаъ аьхю зегьмет зигурача. Хъа программайиъ иштирак духьну гъадабгъу грантдин кюмекниинди, республикайиз гъюрайи хялариз Табасаран райондин утканвал улупури, дурар хъанара артухъди ихь юрднахъди таниш апIидича», – гъапнийи «Цанакский» СПК мяишатдин кIулиъ айи Низамутдин Небиевди.
