Наргиз Гюлечова
Гьамусяаьт Дагъустандин хутIлар-хярариъ гьяракатниинди укIар уршвбан ва игнар апIбан ляхнар кIули гъягъюра. Гьаддихъди сабси, багъ-бахчайиан йимишарра уч апIура.

Иган

Гъулан мяишатдин нежбрари чвлин вазари хутIлариъ гъурзу мягьсулар уч апIуз хъюгъна. Дагъустандин гъулан мяишатдин ва ипIру-убхъру сурсатарин министерствойин пресс-гъуллугънаан туврайи мялуматариинди, гъийин йигъаз республикайиъ чвлин мягьсулар дурзнайи 80 агъзур гектар хутIларикан 21 агъзур гектариъ игнар дургна. ХутIларин саб гектариан 26,5 центнер бегьер уч апIури, вари ккадабцIнайи тахилин кьадар 56 агъзур тонна дубхьна. Тахил уч апIбаан ужудар натижйир улупурайи мяишатар Хасавюрт, Къизлар ва Нугъай районарин ву.

Алаф

Дагъустандиъ мал-къара-йиз алаф уч апIувалра давам шули ими.
Му ляхниъ Къизлар райондин мяишатари гьаму деврин инновацйир ишлетмиш апIуз хъюгъна. Янаки райондин «Аверьяновка» ООО мяишатдиъ кьюрдухьна гьязур шули, мал-къарайиз уч апIурайи сенаж укIак ужуб тяаьм гъубзруганси, думу хусуси вуйи стрейч-пленкайиъди йибтIура.
Му жюрейиинди укI гьязур апIували думу ригъдин нурарихьан, мархьлихьан ва микIрахьан уьбхюра.
Мушваъ уч апIурайи сенаж укI «Кизлярский Урицкий мясокомбинат» ООО-йин мяишатдиъ уьрхюрайи мал-къарайиз кьюрдун вазари тувру асас алаф хьибди. Гъийин йигъаз му мяишатдиъ 360 тоннайин заан ерийин сенаж гьязур дапIна. Хъа планариъ 2 агъзур тонна гьязур апIуб а.

Беълийир

2025-пи йисан белълийирин бегьер уч апIбаъ Урусатдин регионарин арайиъ Дагъустан кьюбпи йишв’ин гъабхьну. Мушваъ 13,5 агъзур тоннайин беълийирин бегьер уч гъапIну Хъа сабпи йишв’ин гъабхьиб – 25,5 агъзур тонна беълийир уч гъапIу Ставрополь край ву.
Асас вуди му йимишар уч апIбаан ужудур натижйир улупдар Кавказдин регионар ву. Гьадму гьисабнаъ Краснодар край, Кабардино-Балкария республика ва Ростовский область а. Гьаму регионариъ гьарсабдиъ 3 агъзур тоннайин беълийирин бегьер гъадабгъну.
Экспертарин гафариинди, цци уч гъапIу беълийирин кьадар сачIтIан 10% за дубхьну, вари 60 агъзур тонна шул кIуримиж ка.