Саб ражари гурхунжви Бакуйиъ дилихну гъулаз кьяляхъ гъюри гъахьну. Вагъунар Дербент шагьриз йишвну гъафнийи. Хъа йишв адапIбан бадали, думу Заан базариъ айи чайханайиз гъягъюру. Чайхана гвачIниндизкьан либхури шуйи ва нивкI хътру кьабидари, сюгьбатар апIури, гьамци йишвар адауйи.
ЦIийи муштари гъяркьган, чайханчийи, дугъаз чай убзну, устлихъ елиг апIуру. Хъа гурхунжвуву, гьялак дарди чай убхъури, шагьрин хабрарихъ хъпехъури, вахт адаури гъузру. Чайрахъ хъипIру шекрин тикйир гьадмукьан жвиллидар вуйики, гурхунжвуву дурар шу-шубубди, ю-юкьубди ушвниз диш апIуз хьюгъру. Гьамци цIиб вахтналан шекер ккудубкIнийи, гурхунжвувура шубубпи кIегьрин чайникра гъубхънийи. Дугъу чаз хъанара чайна шекер хуб ккун апIуру.
Гурхунжвуву чав убхъру чайрахъ гизаф шекер харж апIурайиб чайханчийиз рябкъюрайи, амма хялужвуваз саб гаф пуз дугъаз начди вуйи, гьаз гъапиш мушваъ айидари думу кьис-кьис ву кIури, хиял апIуз мумкин вуйи. Думу вахтари шекер багьалу шейъ вуйи.
Саб кьадар вахтарилан гурхунжвуву чаз йицIисабпи чайник аьбкъин кIури, чайханчийиз ишарат апIуру. Думуганра хялужвуву йирхьуб шекер айи гъаб харж гъапIнийи. Чайханчийи му ражари устлиин хъял кади чай дивнийи ва, хялижвувахьинди чIуруди дилигну, фу-вуш гъапнийи. Чайханчийин чIуру маш гьябкъган, гурхунжвуву хьу-хьубди ушвниъ шекрар ирчуз хъюгъру.
Му чайникра ккудубкIну, чаз хъанара чайна шекер аьбкъин кIури, ишарат гъапIган, чайханчийи, хялужвуван улихь чай диври, рихшант апIури, варидариз ебхьри кIури, гъерхру:
– Аьзиз дагълужви, ичв вилаятариъ саб накьвдик швнур кас киври аьдат ву? – Гьамци дупну, думу зарбди гъяаьлхъю,
Чайханайиъ айидарра вари гъяаьлхъю, хъа гурхунжвира гафарин гъаври гъаши. Дугъу, гъудужвну, гъабраан варитIан бицIи шекер адабгъну, гъапи:
– Гьюрматлу чайханчи, ич вилаятариъ узуси чIатхудар накьвдик са-сарди кивру, хъа мици бицIидар, – улупуру шекрин тики, – хьу-хьурди ва йи-йирхьурди. Учухь накьварра, адмийирра чIатхудар шулу, – гурхунжви аьлхъюру, ва дугъахъди чай убгъурайидарра вари гъяаьлхънийи.
Чайханчийин хъюлаз, кьюбсана чайник дубгъну, дагълужви удучIвуз хъюгъру. Хъа думу кючейизди удучIвган, чайханчийи дугъан кьяляхъди чIигъ апIуру: – Дагълужви, гьюл гьаму терефназди ву! Увуз шид убхъуз ккунди имиш, гьюлихъинди гъарах, гьюлихъинди! АбцI яв дилж!
«Н.Э.Сафарялиев, М. М.Къурбанов. Урху-райидариз рюгьнанна эдеблувалин тербия тувру табасаран халкьдин ва литературайин эсерар» китабдиан. 88-89-пи машар.
