Мейлан Нежефов

Аьхиримжи вахтна Хив райондиъ «Йиз Дагъустан – йиз рякъяр» кIуру проект гьяракатниинди юрутмиш апIура.
Гьаци, Гъвандкарин гъулан кьюб кючейиъ кIекIел абхьри, рякъ тартиб апIури, дид’ин асфальт улубзбан ляхнар кIули гъахуз хъюгъна.
Гъвандккарин гъулан советдин кIулиъ айи Сарухан Мягьямедхановди узуз туву мялуматаринди, гъулан кьялан ва кьибла терефнан кючйириин асфальт улубзбахьна вуйи гьязурлугвалин ляхнар кIули гъахура. Вари гьисабназ гъадабгъиган, рякъюн манзил 1 км шула.

«Му жавабдар ляхин «Шанс» ООО-йи чаина гъадабгъна. Кьялан кючейиъди агьалйир тазади дивнайи гъулан ФАП-диз гъягъюру, хъа кьибла терефнан кючейиъ гъулан аьхюнубсиб пай агьалйир яшамиш шула, яна кьюбиб кючйирра ликрикк ккайидар ву. Ихь гъулахъди сабси му компанияйи Хирижв гъулаъра расвалин ляхнар гъахура», – ктибтнийи Сарухан Мягьямедхановди. Дугъу гъвандккарин жямяаьтдикан сацIиб сабур апIуб ккун гъапIнийи, фицики гьавйири пландихъди сабси ляхнар ккудукIуз цIиб манигъвал апIура.