Зубайдат Шябанова
Табасаран райондин Гюгьрягъ гъулаъ 2026-пи йисан цIийи мектеб дивуз планарик ка. Мидкан гьаму йигъари РД-йин глава Сергей Меликовди, Табасаран райондин кIулиъ айи Мягьямед Къурбановдихъди, республикайин образованиейин министерствойин ва жара идарйирин руководителарихъди гюрюшмиш гъахьиган, мялумат тувну.
Гюгьрягъ гъулаъ цIийи мектеб тикмиш апIуб серенжемдин асас темйирикан саб вуйи. Гъийин деврин тIалабариз жаваб шлу цIийи мектеб дивуб ккун апIури, гъуландарин терефнаан республикайин главайихьна Гюгьрягъ гъулан вакил Сефербег Мамадов илтIикIну. Дугъан гафариинди, 2019-пи йисан гъулан мектеб абхърайиб вуди гьисаб гъапIхъанмина, 150-рихьна баяр-шубар жара касдин арендайиз гъадабгънайи хулариъ аьгъювалар гъадагъуз мажбур духьна.
Республикайин главайиз хабар тувганси, райондин администрацияйи Гюгьрягъ гъулаъ цIийи мектеб дивайиз улихьна лазим вуйи вари кагъзар уч апIбаан кьатI’и ляхин гъубхну. Гьадму гьисабнаан лазим вуйи документарин пакет тартиб гъапIну, проектаринна сметайин документация гьюкуматдин экспертизайи тасдикь гъапIну. РД-йин образованиейинна илимдин министр Ягь’я Бучаевди думу мектеб тикмиш апIбан ляхнар республикайин 2030-пи йисаз варитIан важиблу тикилишчивалин ляхнарин пландик кипнайиваликан гъапнийи.
Сергей Меликовди 2026-пи йисан Гюгьрягъ гъулаъ цIийи мектебдин тикилишчивалин ляхнар ккергъну ккуниваликан ва думу мектебдин бинайиин аьлава образованиейин ва спортдин дараматарра гьисабназ гъадагъну ккунивал кIваин гъапIну. Думу метлебариз пулин дакьатар улубкьурайи йисан жара апIиди.
«Подрядчикар фужар шулуш гъядягъювал лап важиблу ву. Дурари вахтниинди ляхин тамам дапIну ккунивал ва гъахурайи ляхнин ери гьаммишан гюзчиваликк дюбхну ккунду. Гьаддиз му месэлайин жавабдар десте тешкил апIурухьа. Думу дестейин дахилнаъ гъулан жямяаьтлугъдин вакиларра ади ккунду. Гьадмуган ухьу улихь дивнайи планарихъ хъуркьдихьа», – гъапнийи республикайин главайи.
Мягьямед Къурбановди райондин жямяаьтдин терефнаан му месэла гьял апIбаъ кюмек тувбаз республикайин главайиз чухсагъул гъапну.
Аьхириъ муниципалитетдин кIулиъ айири къайд гъапIганси, райондин администрацияйи халкьдин образованиейиз аьхю фикир тувра. Дурарин жягьтлувалариз республикайин главайира аьхю кьимат тувра.
«Сергей Алимовичдин кюмекниинди гъубшу йисан райондин кьюб гъулаъ, Туруф ва НичIрас, цIийи мектебарин дараматар ккудукIуз гъабхьну. 2026-пи йисан Хюрикк гъулаъ 500-дихьна баяр-шубариз деъру йишвар айи аьхю мектеб абццуз планарик кайихь. Мидланра савайи образованиейин инфраструктура цIийи алапIбаанра хайлин ляхин дубхна. Гьаци, райондин 12 мектебдиъ «Мектебарин образованиейин гъурулушдин модернизация» кIуру федеральный программайин бинайиин алди, «100 мектеб» проектдин кюмекниинди 34 мектебдиъ капитальный расвалин ляхнар гъухну. Багарихьди Жулжагъ ва СертIил гъулариъра цIийи мектебарин тикилишчивалин ляхнар ккергъди. Райондиъ аварийный гьялнаъ гъузрайи имбу мектебаризра фикир тувдихьа», – гъапну Мягьямед Къурбановди.
