Гюльнара Мягьямедова
Табасаран райондин кIулиъ айи Мягьямед Къурбановди улихьна йигъари мектебариъ гьюкуматдин натижйир йивбаан аттестация гъабхбахьна гьязурлугваларин месэлйириз бахш дапIнайи совещание кIули гъубхну.
Серенжемдин еришдиъ туву мялуматариинди, гьаму ктабхъурайи урхбан йисан райондиъ 335 выпускникди ЕГЭ ва 825-ри ОГЭ тувди. Дурар вари ГИА тувбахьна деетна.ГИА тувбан бадали Хючна гъулан 1-пи нумрайин многопрофильный лицейиъ, ТIаттил ва Хянягъ гъуларин мектебариъ имтигьнар тувуз 3 пункт гьязур дапIна.
Райондин вари мектебариъ ГИА туврударин абйир-бабарихъди собранйир гъухну, тешкилатчйирин гьязурлуг’вал ахтармиш гъапIну.
Совещание ачмиш апIури Мягьямед Къурбановди къайд гъапIганси, ГИА тешкил апIувал ва гъабхувал хусуси гюзчиваликк кка, гьаддиз имтигьнар гъахру пунктар лазим вуйи гьарсабдихъди тяминди ккунду.
Райондиъ имтигьнар гъахру пунктарин гьязурлугваликан образованиейин управлениейин кIулиъ айирин заместитель Бахиш Аьгь-медовди мялуматар тувнийи. Дугъан гафариинди, имтигьнар гъягъру вахтнаъ видеогюзчивал гъабхру техника ахтармиш дапIна, айи тяминатар гьисабназ гъадагъна, гьуркIри адру алатар масу гъадугъбан бадали, дурарин сиягь гьязур дапIна.
Имтигьнар гъахру пунктариъ рукь улупру алатар а, видеогюзчивал гъабхру техника гьаммишан либхури гъитбан бадали, генераторар дивна.
Совещаниейин иштиракчйири экзаменар кьабул апIру вахтна интернет-аьлакьа тямин апIбан, имтигьянар гъахру вахтнаъ пунктари ъхатIасузвал уьбхбан, лазим гъабхьиш медицинайин кюмек тувбан месэлйирра гъитIирккнийи.
Урусатдин МВД-йин Табасаран райондиъ айи отделин начальник Рягьим Аслановди имтигьнар гъахру пунктариъ урхурайидарихъди дуфнайи багахьлуйир уч дархьбан теклиф дивнийи.
Имтигьянар гъахру вахтнаъ вари пунктариъ медицинайин гъуллугъчйир ва Табасарандин РЭС-дин пишекрари дежурство гъабхиди.
Совещаниейин аьхириъ Мягья-мед Къурбановди уч духьнайидарикан ГИА-йиз жавабдарвалиинди гьязур духьну, думу заан дережайиинди кIули гъабхуб ккун гъапIну.
«Ихь метлеб гьюкуматдин натижйир йивбаан аттестация къайдайиинди, гъалатIар адарди гъабхуб ву. Хъа лазим вуйи къайдайиинди ляхингъабхбан бадали, вари шартIар тямин дапIну ккунду», – къайд гъапIну Мягьямед Къурбановди.
