Зубайдат Шябанова

Июндин 3-пи йигъан Табасаран райондиъ Хючна гъулан 2-пи нумрайин мектебдин ва ТIивак гъулан Ю. Базутаевдин ччвурнахъ хъайи мектебдин бинайиин хьадан лагерарин сабпи смена ачмиш гъапIну.

 

Сабпи сменайин вахтна думу лагерариъ 150 бицIири рягьятвал гъадабгъиди.
Лагерар ачмиш апIру йигъан шадлугънан серенжемар кIули гъушну. Мектебарин директорар Панагь Султановди ва Шарафудин Агъасиевди бицIидар къаршуламиш апIури, дурар хьадан тятIилар ккергъбахъди тебрик гъапIну ва дурариз маракьлуди, шадди, хатIасузвалиинди рягьятвал гъадабгъуб, цIийи дустарихъди таниш хьуб ва аку гьиссар кьисмат хьуб ккун гъапIну.

Лагерарин программайиъ рягьятвал гъадабгъбан, сагъламвалин ва артмиш’валин ляхнар жа-жаради улупна. Гьар йигъан гвачIин зарядкайилан ва ушв гьибтбалан ккебгъру. Сменайин вахтна бицIидарин бажаранвалар ачмиш апIуз шлу хайлин программйир ва тамшир кIули гъахиди, гьадму гьисабнаан командйирин арайиъ вуйи тамшир, устадарин карханйир, аьгъювалар тувру серенжемар ва гь.ж.