Зубайдат Шябанова
Гьаму йисан хьадан тятIиларин вахтна Дагъустандиъ 200-тIан артухь лагерариъ 37 агъзур бицIири рягьятвал гъадабгъиди.
Улихьна йигъари Дагъустандин образованиейин ва илимдин Министерствойин кIулиъ айи Яхья Бучаевди Дагъустандин ЦУР-ин прямой эфириъ мялум гъапIганси, гьаму йисан республикайиъ шагьрарихьан ярхла айи 27 ва мектебарин бинайиин вуйи 200-дихьна хьадан лагерар ляхник кирчди.
Мидланна гъайри, Урусатдин жюрбежюр регионариан хусуси метлеб айи операцияйиъ иштирак шулайи эскрарин 615 бицидаризра Дагъустандин лагерариз путевкир тувру. Гьацира 750 бицIир Запорожский областдиан кьабул апIуз планламиш дапIна.
Хьадан тятIиларин вахтна бицIидари рягьятвал гъадабгъбан серенжемарин программа ва улихь дивнайи метлебар кIулиз адагъбан бадали, РД-йин Образованиейин ва илимдин министерствойиан республикайин вари районарин образованиейин управленйириз ва отделариз мектебарин бинайиин йигъандин лагерар арццбахъди аьлакьалу вуди, Урусатдин марафондиъ иштирак хьуз табшурмиш гъапIну.
Думу марафондиъ Табасаран районра иштирак хьпанди гъахьну. Ва июндин 5-пи йигъан райондин гимназияйин бинайиин лагерь ачмиш гъапIну.
Думу ачмиш апIбан серенжемдиъ Табасаран райондин главайин заместитель Заур Мусаев, образованиейин управлениейин начальникдин заместитель Эсмира Халидова, «Юлдаш» гимназияйин директор Элина Шихмягьямедова ва жарадар иштирак гъахьну.
«Хьадан лагерь – му шадди, разиди, ва мянфяаьт кади вахт гьапIру йишв ву. Мушваъ бицIидариз чпин фикир адабшвуз, яратмишарихьна юкIв зигуз ужудар мумкинвалар тешкил апIура. Учву вахт маракьлуди, гьевеслуди, жанлуди ва кIваълан гьадрахрубси гьапIбан бадали, тербиячйирин ва вожатйирин дестейи ужуб программа тартиб дапIна. Конкурсариъ, спортдин талитариъ, литературайин серенжемариъ иштирак хьуз ва сагъвал мюгькам апIури рягьятвал гъадабгъуз учвуз ягъур ибшри», – гъапну Заур Мусаевди, лагериъ айи бицIидарихьна илтIикIну. Лагерь ачмиш дапIну саб-кьюд йигъ улдубчIвбан кьяляхъ узу гимназияйин директор Элина Шихмягьямедовайихьан, бицIидарин гьевес фициб вуш, дурар артухъси фтиин машгъул шулаш, фицдар читинвалар алахьураш, гьерхнийза.
«Гимназияйин бинайиин 5-пи июнди 100 бицIириз йигъандин лагерь ачмиш гъапIнийча. Дюзди гъапиш, лагериз му кьадар гъюз ккунидар шулу кIури, фикир дайиз. Саки гьар йигъан жара ярхла гъуларианра зенг апIури, лагериъ йишвар аш, гьерхра. Абйир-бабар бицIидар чпи хуз-гъахуз гьязур ву. Амма, гьяйифки, йишвар адар. Гьамусяаьт лагериъ айи вари бицIидар Хючнаан ва багахь гъулариан ву. Лагерь 21 йигъан, саб сменайиъ либхуру. Райондиъ гьаму жюрейин проект гьяракатнаъ ипри, сабпи раж ву. Му проектдиз «Хьадлан илтIикIурайи 21 йигъ» ччвур тувнача», – ктибтура Элина Шихмягьямедовайи.
Директорин гафариинди, лагериз гъюрайи 100 бицIир 4 дестейиз пай дапIна. Дурарихъди 4 вожатый, сар тешкилатчи-педагог, сар аьхю тербиячи, сар физкультурайин инструктор хъа. БицIидар гачIвнинган сяаьт 9-дин гьацI’ан сяаь шубубдин гьацIаз лагериъ шулу. Дурариз кьюб ражари пулсузди хураг гьивра.
«Вари бицIидар аьхю аьшкьниинди лагериз гъюра. Гъи бицIидар райондин модульный библиотекайиз душну, Пушкиндин эсерар урхбан конкурсариъ, шиърар зигбан серенжемариъ иштирак гъахьну. Улихьна йигъан бицIидариз наркотикариз аькси пропагандайин видеороликар улупунча. Гьаму йигъари сагъвал мюгькам ва зяиф апIру жюрбежюр гъиллигъарикан ктибтиди, конкурсариъ, спортдин серенжемариъ иштирак хьиди ва экскурсйириз гъягъиди. Хьадлан илтIикIурайи 21 йигъкан гьарсаб йигъ бицIидарин кIваълан гьадрархрубси маракьлуб ва мянфяаьтлуб хьибди», — гъапну гимназияйин директор Элина Шихмягьямедовайи.
