Гюльнара Мягьямедова
Урусатдин Оборонайин министерствойи мялумат тувганси, 2026-пи йисан жигьил баяр армияйиз гъахбан хьадукран серенжем ккудубкIну. Идарайин улупбариинди, Урусатдин Яракьлу кьувватарин жергйириъ гъуллугъ гъабхуз 141 агъзур кас гьаъну.

Призывникариз военный комиссариатариз гъюбан гьякьнаан электронный повескйир хътаури гъахьну. Думу повесткйир хъадаънайиб ачухъ вуйи сиягьариъра улупнайи. Призывдиинди эскервалин гъуллугъназ гъухдар военный техникайихъди таниш апIуз ва эскервалин пише гъадабгъуз урхбан тешкилатариз ва эскервалин частариз гьаъну.
Оборонайин министерствойиан туврайи мялуматариинди, призывдиинди армияйиз гъуху жигьил баяр Донецкдин халкьдин республикайиз, Луганскдин халкьдин республикайиз, Запорожьейин ва Херсондин областариз гъуллугъ гъабхуз гьаърадар. Дурар хусуси метлеб айи дявдин операцияйин месэлйир гьял апIбиинара жалб апIурадар. Чпин ватандаш’валин буржи тамам апIуз гъягъюрайидар эскервалин частариз гъахбан бадали, РФ-дин Яракьлу Кьувватарин самолетарин 20 рейс, ватандаш авиацияйин 140 рейс, кьушмарин 13 эшелон, пассажирар гъахру поездар ва гьацира воинский частарин машинар жара гъапIнийи.
Министерствойиъ къайд гъапI-ганси, асас фикир илимдин, илимдинна гьясиллувалин ва спортдин ротйир эскрарихъди тямин апIбаз тувну. Илимдин ва илимдинна гьясиллувалин ротйириз 784 кас, хъа спортдин ротйириз 239 призывник гъухну.
Дагъустандиъра призывдин кампания вахтниинди ва заан ерийиинди кIули гъубшну. Дидин гьякьнаан региондин военный комиссар Аьбдурягьман Мурадхановди мялумат тувну.

 
Вахтназди Дагъустандин главайин вазифйир тамам апIурайи Федор Щукиндин регьберваликкди кIули гъубшу Республикайин призывдин комиссияйин заседаниейиъ Аьбдурягьман Мурадхановди гъапиганси, гъийин йигъаз республикайиан 1996-2008-пи йисан бабкан гъахьи 3200 жигьил баяриз армияйиз дих дапIна.

Армияйиз душнайи вари ихь жигьилариз, ватандаш’валин буржи хъуркьувалиинди тамам дапIну, сагъ-саламатди чпин хулариз кьяляхъ гъюб ккун апIурахьа.