Мейлан Нежефов

1-пи сентябриъ Хив райондин мектебариъ варитIан аку мяракйир – сабпи зенг йивбан шадлугънан серенжемар кIули гъушну. Хьадан шубуб вазлин тятIилар ккудукIну мектебариз гъюрайи урхурайидарин жергйир 167 сабпи классдиз гъюрайи шерефтйири яркьу гъапIну.

 

Хайлин йисари РД-йин халкьдин собраниейин депутатди гъахьи, хъа гьамус, ДГПУ-йин ректорди лихурайи Нариман Асваровди, «Славица мороженое» ООО-йин кIулиъ айи Балакерим Мягьямедовди, Госдумайин депутатдин кюмекчи Сиражудин Гьяжимягьямадовди ва видео-оператор Румблет Сяидовди уьмрин рякъюъ сабпи гамар алдабгъурайи бицIидариз мектебдиз лазим шлу алатар гъадагъуз аьхю кюмек тувну.

Вари абйир-бабарин терефнаан халис ватанперверариз чухсагъул мялум апIураза. АйибтIан кьюбдри артухъ апIри чпин. Дугъриданра, айи йишв’ан кубкIру гъапиганси, абйир-бабариз дурари аьхю кюмек тувну, фицики гъи швнур-сар велед мектебдиз гьязур апIуб зарафат дар.
Му аку чвлин сабпи йигъан мектебдин гьяятдиз гъушури сабпи ражну сабпи классдиз ликар алдагъурайи баяр-шубарихъди сюгьбат гъубхунза. Фици урхуз ккачва, закурин йигъан учвуз фужар хьуз ккундучвуз, кIуру йиз суалариз сану бали жаваб туву саягъ гъябкъган, мюгьталра гъахьунзу, ва дугъан гафари хлинццарра кивунзук.

«Узуз Ибрагьим Ибра-гьимов кIурузуз. Дарсар ужуди урхуз кказа. Аьхю гъахьиган, духтир хьуз ккундузуз. Йиз адаш ва эм дявдиъ айиз. Чпиз зийнар гъахьи вахтна ва хъана чписдар гизафдар айивалиан лигру духтрар цIибтIан адайи, айидарра лигуз хъуркьурдайи, гъапну. Духтир хьуз ва инсанариз кюмек апIуз ккундузуз», – жаваб тувну сабпи классдиз гъюрайи, хъа фикрар аьхю классариъ айиринсдар вуйи, хаб кюкйирин кунцIру хъабцIнайи Ибрагьимди.
Гъит Ибрагьимдиз ва дугъан таяриз заан дережайин аьгъювалар гъадагъру, хъуркьувалар айи, хайирлу урхбан йис ибшри. Дюн’яйиъ ислягьвал ва ихь закурин насларин гележег акуб ибшри!