Умгьанат Сулейманова
Сагъди вуйиган, уьзрарикан, духтрарикан кIваинра шулдархьуз, хъа аьзарлу гъахьиган, кюмек ккун апIури, духтрарихьна илтIикIурухьа. Ухьуз гъийин йигъан гизаф духтрар ахьуз, хъа чан пишейин тIалабар намуслувалиинди тамам апIурайидар, гьяйифки, цIибтIан дар.
Йиз улхуб чан ляхин лап дериндиан ккуни, духтирвалин аьхю тажруба айи Урдихан Урдихановдикан вуйиз. Ккудубшу 2023-пи йисан декабрин 17-пи йигъан Урдихан Урдиханов «Дагъустан Республикайин халкьдин духтир» ччвурназ лайикь гъахьну. Дугъаз думу ччвур, чан ляхнихьна жавабдарвалиинди янашмиш шулайивализ, духтирвалин гъуллугънаъ аьхю вахтнан муддатнаъ лихувализ лигну, тувуб ву.
Урдихан Агъабаевич Урдиханов 1954-пи йисан Хив райондиъ Заан Яракк бабкан гъахьну. Багъри гъулан кьялан мектеб ккудубкIну, думу Дербент шагьриъ медицинский училищейик урхуз кучIвну. 1974-пи йисан жигьил пишекар Хив райондин Зирдагъ гъулан ФАП-дин заведующийди гьаъру, ва гьадму йисан чвну кьюд йисаз армияйиз гъахуру.
1976-пи йисан эскервалин гъуллугъ тамам дапIну кьяляхъ гъафир, Урдихан Урдиханов Дагъустандин мединститутдик урхуз кучIвру. Вуз ккудубкIу жигьил пишекри, Мягьячгъалайиъ РД-йин бицIидарин клиникайин реанимацияйин отделениейиъ заведующийди ляхин апIуз хъюгъру. Хайлин йисарин духтирвалин тажруба айи Урдиханов 1996-пи йислан 2012-пи йисазкьан Хив райондин ЦРБ-йин главврачди, хъа 2012-пи йислан 2015-пи йисазкьан Каспий шагьриъ ООО «Целитель» поликлиникайин главврачди гъилихну.
2016-пи йисланмина Урдиханов Мягьячгъалайиъ Республикайин С.М. Мягьямедовдин ччвурнахъ хъайи тарагъру уьзрарин улихьишв бисру больницайиъ анестезияйин ва реаниматологияйин духтирди лихура. Думу больницайиъ, аьзарлу касдиз кюмек хьпан бадали, духтирвалин вазифйир лап марцциди ва ляхин аьгъяди дапIну ккунду. Хъа ихь ватанагьлийи чан ляхин хъайи-хъайибси, кIваантIан апIурайивализ лигну, дугъаз «РД-йин лайикьлу духтир» ччвур ва гьюкуматдин хайлин наградйир тувна. Гъийин йигъанра думу духтрихьна республикайин жюрбежюр пIипIариан агьалйир илтIикIуру.
Урдихан Урдиханов ужур духтирси, аьхю хизандин кIулра ву. Дугъаз ва дугъан уьмрин юлдаш Сейбатдиз шубур риш ва сар бай а. Шубрид шубарра, заан образование гъадабгъну, чпин кIваз хуш вуйи пишейин эйсйир духьна. Кьюр велед адашдин шилнаъди гъушну – бай ТIагьир РД-йин сагъламвал уьбхбан министерствойиъ лихура, Джамиля Дербент шагьриъ ЦГБ-йиъ кIван духтурди лихура.
«Табасарандин нурар» газатдин коллективди «Халкьдин духтир» ччвурназ лайикьлу хьувалихъди мубарак апIури, Урдихан Урдихановдиз республикайин агьалйирин сагъламвал уьбхбан рякъюъ аьхю хъуркьувалар ва хизандиъ хушбахтвал ккун апIура.
