«Ростелеком» ПАО-йин Дагъустандин филиалин бинайиин 18-пи, 19-пи, ва 20-пи сентябри сечкйирихъди жямяаьтлугъ гюзчивал гъабхру центр ерлемиш дапIнайи. Амирхан Мягьямаддадаевдин гафариинди, душваъ 20 касдилан зиина политологари, журналистари, экономистари ва волонтерари ляхин гъапIнийи. Гьадму гьисабнаъди, шубуд йигъан ич газатдин вакиларира центриъ сечкйирихъди гюзчивал гъабхури гъахьнийи.


«Гьаму шубуд йигъ центриъ лап гъизгъиндар гъахьнийи. 700-кьан сечкйирин участокариан видеогюзчивал гъабхури гъахьунча. Гюзчивал гъабхурайидариз саб бицIи къайдасузвал гъябкъишра, дишлади сечкйирин участокдиз дих дапIну, арайиъ айи къайдасузвал терг апIуб тIалаб апIру дестейи ляхин апIурайи. Марцци кIваан пуз шулзухьан, къанун чIур апIру саб жюрейин къайдасузвал гъабхьундайи», – гъапнийи Амирхан Мягьямаддадаевди.

 
Динислам Дадаевди мониторингдин дестейин ляхникан ктибтнийи. Дугъу гъапиганси, гьарсаб участокдихъди дикъат гюзчивал гъабхурайи. Сесер тувру вахтна 8 агъзуртIан артухъ агьалйирин терефнаан аьрзйир гъахьнийи: участокар ачмиш апIбан гьякьнаан, гъавриъ адру суалариз жаваб ккун апIрудар ва гьацира аьдати дару дюшюшарикан.

 
«Учухьна жюрбежюр фейкарикан мялуматар гъюйи гъахьну, юристарихъди сатIиди дурар ахтармиш апIури гъахьунча. Пишекрари гьарсаб ляхниз дугъри жаваб туври гъахьну. Амма натижйирин марццивалиина шак гъюру сабкьан дюшюш гъабхьундар. Учу СКФО-йин вари регионарихъди «гергми стол» гъубхунча, ич видеосюгьбатариъ уьлкейин 70 субъектдиан жямяаьтлугъ палатйирин ва штабарин вакилар иштирак гъахьнийи», – ктибтнийи Динислам Дадаевди.

 
Дугъу аьлава гъапIганси, сесер тувру кьюбпи йигъан сечкйирин участокариз варитIан гизаф инсанар гъафнийи.
Эдуард Урузаевди сечкйирин аьлава натижйирин анализ гъапIнийи. Дугъан гафариинди, Дагъустан Республикайин цIийи дих апIбан Халкьдин Собраниейиъ политикайин шубуб партияйин вакилартIан хьидар. «Дагъустан уьмуми Урусатдин гьяракатарин къириъди гъябгъюра. Аьдати вуйиси, дагъустанлуйир сечкйириъ ужуди иштирак гъахьну. Саб мандат айи округариъ «Саб вуйи Урусат» партияйин вакилари гъалибвал гъадабгъну: «Саб вуйи Урусатди» – 74% сесер, «Гьякьлу Урусатди» – 12% сесер, КПРФ-ди – 11% сесер, ЛДПР ва «ЦIийи инсанар» партйири 2%-кьан гъадабгъундар», – гъапнйи Эдуард Уразаевди.

 
Сечкйириъ гъалибвал гъадабгъу гьюрматлу депутатар! Халкьди учв’ин хъугъвал дапIна. Гьадму хъугъвализ даягъ йихьай, сечкйириз улихьна учву туву гафар ва кIул’ина гъадабгъу жавабдарвал кIваълан магьапIанай. Учвуз ихь халкьдин яшайишдин месэлйир гьял апIбаъ, ватандашарин къанундин ихтиярар уьрхбаъ хъуркьувалар ишричвуз.