Гюльнара Мягьямедова

2026-пи йисан 18-20- пи сентябри Дагъустандиъ РФдин Государствойин Думайиз ва Республикайин VIII дих апIбан Халкьдин Собраниейиз депутатар ктагъбан сечкйир кIули гъушнийи. Халкьдин Собраниейиз ктагъу депутатарин арайиъ ихь миллетдин вакиларра а. Гъи газатдин машнаъ учву, гьюрматлу газат урхурайидар, гьадрарихъди таниш апIурача. 

Зугьрабов Мягьяч Зугьрабович 1973-пи йисан 15-пи ноябри Табасаран райондин Хюряхъ гъулаъ бабкан гъахьну. 2002-пи йисан Дагъустандин гьюкуматдин университет ккудубкIну; гьацира Москвайин Серго Орджоникидзейин ччвурнахъ хъайи геологоразведочный академияйиъ «юрист» ва «инженер» пишйир гъадагъну. 

Мягьяч Зугьрабов хайлин йисари Москвайин областдиъ ва Москва шагьриъ яшамиш шула. 2012-пи йисхъанмина Москвайиъ «Тапиз» ООО-йин генеральный директор ву. Дугъан компанияйин асас ляхин парчйирихъди алвер гъахуб ва ресторанарин бизнес ву.

Мягьяч Зугьрабов хусуси метлеб айи дявдин операцияйин иштиракчи ву. Дугъаз «Хусуси метлеб айи дявдин операцияйиъ гъалиб хьпак пай кивбаз лигну», «Дявдин женгариъ тафавутлу хьпаз лигну», «Дявдин дуствал мюгькам апIбаз лигну», Урусатдин ва Беларусдин союздин гьюкуматарин медалар а. Мидланра савайи, 2024-пи йисан Москва шагьрин военный комиссариатдин терефнаан, 2025-пи йисан Идрицко-Берлинский  Кутузовдин II дережайин дивизияйин мотострелковый гвардияйин 150-пи командованиейин ччвурнахъан чухсагъул мялум апIурайи кагъзар тувна, хайлин жара грамотйир а. 

Табасаран райондин депутатарин собраниейиъ «Саб вуйи Урусат» фракцияйин депутатди кадагъна. РД-йин Халкьдин Собраниейин образованиейин ва илимдин комитетдин член ву.

Аваев Имран Наврузбегович 1982-пи йисан Каспийск шагьриъ бабкан гъахьну. 2004-пи йисан Дагъустандин гьюкуматдин университетдиъ экономиствалин, 2014-пи йисан Дагъустандин гьюкуматдин технический университетдиъ тикилишчиинженервалин пише гъадабгъну; дугъу гьацира 2018-пи йисан РФ-дин Президентдин багахь хьайи Урусатдин халкьдин мяишатдин ва гьюкуматдин гъуллугънан академияйин гьюкуматдин ва муниципальный идара апIбан факультет ккудубкIну.

Дагъустан Республикайин VIII дих апIбан Халкьдин Собраниейин депутатди Мягьячгъала шагьрин Кировский райондин «Саб вуйи Урусат» партияйин сиягьнан сабпи нумрайин дестейин терефнаан кадагъна. Республикайин парламентдин бюджетдин, финансарин ва налогарин комитетдин член ву. VII дих апIбан РД-йин Халкьдин Собраниейин депутатдира гъилихну. 

«Саб вуйи Урусатдин» региондин жямяаьтлугъ кьабул апIру йишваъ гьаммишан ватандашар кьабул апIури, Мягьячгъалайин хайлин агьалйириз кюмек тувну. Депутатди лихурайи вахтна дугъу гьацира образованиейин идарйиризра кюмекнан хил гьачIабккури гъахьну: 52-пи нумрайин лицейиз музыкайин алатар, мектебдин багахь хьайи 33-пи нумрайин лагериз спортдин алатар, багъри 5-пи нумрайин лицейиз теннис уйнамиш апIру стол масу гъадагъну. Дидлан савайи, хусуси метлеб айи дявдин операцияйиъ иштирак шулайидарин веледариз ва сагъламвалиан сакьат бицIидариз рягьимлувалин акцйирра тешкил апIури гъахьну.

 Гьяжиагъаев Расим Везирханович 1986-пи йисан 19-пи декабри Хив райондин Ургъа гъулаъ бабкан гъахьну. 2010-пи йисан Дагъустандин гьюкуматдин педагогвалин университет ккудубкIну, «физикайин мялим» пишекарвал гъадабгъну. 

Расим Гьяжиагъаевди чан зегьметнан рякъ 2008-пи йисан Ургъа гъулан кьялан мектебдиъ физикайин ва математикайин мялимди лихури ккебгъну. 2015-пи йисхъан 2021-пи йисазкьан «Ургъ’арин гъулан совет» гъулан поселениейин главади гъилихну. 

Дагъустан Республикайин VII ва VIII дих апIбан Халкьдин Собраниейин депутат, «Саб вуйи Урусат» фракцияйин член ву. 2025-пи йисан феврали Расим Гьяжиагъаев республикайин парламентдин образованиейин ва илимдин комитетдиан хусуси метлеб айи дявдин операцияйин ветеранарин ва иштиракчйирин комитетдиз гьаънийи. 2026-пи йисан 1-пи октябри РД-йин Халкьдин Собраниейин образованиейин ва илимдин комитетдин председателди тяйин гъапIну.

Расим Гьяжиагъаев Дагъустандин парламентдин депутатарин арайиан сарпир вуди 2022-пи йисан сентябрь вазли чан хушниинди хусуси метлеб айи дявдин операция гъабхурайи йишваз гъушнийи. Дидиз улихьнара ДНР-ин ва ЛНР-рин жилариина рягьимлувалин кюмек хьади швнубсабан гъягъюри гъахьну. 

Расим Гьяжиагъаевдиз Святой Георгийдин ордендин лишан – VI дережайин Георгиевский хач, «Эскервалин жюрэтлувализ лигну» II дережайин медаль, «Хусуси метлеб айи дявдин операцияйин иштиракчи» медаль, «Жигьилариз ватанпервервалин тербия тувбаз лигну» Амет-Хан Султандин ччвурнахъ хъайи медаль, РД-йин Халкьдин Собраниейин гьюрматнан грамота, Дагъустан Республикайин Халкьдин Собраниейин председателин терефнаан чухсагъул мялум апIурайи кагъаз, РД-йин Халкьдин Собраниейин председателин ччвурнахъан вуйи сяаьт тувна.

Аьбдулаев Амир Эседуллаевич 1996-пи йисан 15-пи октябри Табасаран райондин ТIаттил гъулаъ бабкан гъахьну. 2019-пи йисан Урусатдин Федерацияйин Президентдин багахь хьайи Урусатдин халкьдин мяишатдин ва гьюкуматдин гъаллугънан академия ккудубкIну, «гьюкуматдин ва муниципальный идара апIувал» пише гъадабгъну. «Газпром межрегионгаз Махачкала» ООО-йиъ газдин мяишатдин ахтармишар гъахрурди лихура. 

Дагъустан Республикайин VIII дих апIбан Халкьдин Собраниейин депутат ву. «Саб вуйи Урусат» партияйин сиягьнаъди Дагъустандин Огни шагьрин вакил вуди кадагъна. Парламентдин экономикайин, инвестицйирин ва предпринимателвалин комитетдин член ву. 

РД-йин VIII дих апIбан Халкьдин Собраниейин варитIан жигьил депутат ву – депутатди ктагъруган, дугъан 29 йистIан дайи.

 Гьюрматлу Мягьяч Зугьрабович, Имран Наврузбегович, Расим Везирханович, Амир Эседуллаевич! Учву Халкьдин Собраниейин депутатарди ктагъбахъди кIваантIан тебрик апIурача. Ихь халкьди республикайин къанунчивалин бина къайдайиз хувалин читин месэла учвуз табшурмиш дапIна. Ичв пишекарвали, республикайин гележегдихъан гъабхурайи жавабдарвали гьякьлу политика гъабхур кIури, агьалйирин яшайишдин аьгьвалат за апIбан месаэлйир сабпи йишв’ин дивур кIури, умуд киврача. Учвуз ихь халкьдин гъуллугънаъ хъуркьувалар ккун апIурача.