Нариза ТIаибова
Дагъустандин саб жерге миллетари цIийи йис къаршуламиш апIувал, мялум вуйиси, улихьдин заманйирилан чпин кюгьне гьисабариинди вуйи ригъ илбицу сабпи йигъахъди аьлакьалу апIура.

 

Милли жюрбежюрвалин натижайиъ му машквраз гьарсаб миллетди чаз хас вуйи ччвур тувна. Гьаци, табасаранари дидиз – «Эбелцан», лезгйири – «Яран Сувар», азербажанари ва гьацира жарадари – «Навруз-байрам» кIуру. Амма машквар къайд апIбан асас къайдйири вари халкьар сатIи ва уьмуми апIура.

Шадлугъар ачмиш апIури, культурайин гъуллугъчйирин мяълийириккди мяракайиз гьяйвниинди, хилиъ цIин чирагъра ади, «Хьадукар-риш» гъафну. Серенжем РФ-дин Президентдин къарариз асас вуди мялум дапIнайи Халкьарин сабвалин йисан лишниккди кIули гъубшну.
Хиварин гъулан агъсакъал Нажмудин Ягъибеговди машквран цIа кабхьбан кьяляхъ, улубкьнайи йисан ужуб бегьер гъадабгъбак жямяаьтлугъди умуд киврайивал субут апIури, райондин культурайин вакилари «Хьадукар дуфна» мяълийиккди тялукь сягьна улупнийи.
Райондин агьалйир му машкврахъди тебрик апIури, Хив райондин глава Ярмет Ярметовди гьарсариз мюгькам сагъ’вал, хизандиъ мясляаьт ва берекет, вари уьлкейиъ жямяаьтлугъдиз сабвал хьуб ккун гъапIну.
Хъасин Хив райондин агьалйир хьадукран му машкврихъди Дагъустан Республикайин Гьюкуматдин секретарь Нюсрет Омаровди, РД-йин Халкьдин Собраниейин депутат Алавудин Мирзабалаевди, Табасаран райондин глава Мягьямед Къурбановди, Дагъустандин Огни шагьрин глава Замир Гьяжимурадовди тебрик гъапIну.

Серенжем маракьлу апIури, райондин культурайин Хулан гъуллугъчйири, табасаран ва лезги эстрадайин машгьур артистари тамашачйириз концерт улупну.
Машквран мяракайиъ, халкьдин тарих кIваин апIури, жюрбежюр милли аьдатарра улупну.
Эбелцнан машквар къайд апIбан дахилнаъди му йигъан райондиъ гьацира спортдин милли жюрйириан (гьяйвнар жаргъбаан, шалмник кеъбаан, гъагъ за апIбаан, хил ккипбаан, тIил зигбаан) талитарра гъухну. Гъалибчйир ва ужудар натижйир улупу спортсменар кьиматлу пешкешариинди лишанлу гъапIну.