Феруза Рамалданова
Мялум вуйиганси, Урусатдин Федеральный Собраниейин Государ-ственный Думайиз ва Дагъустандин Халкьдин Собраниейиз депутатар ктагъбан сечкйириз имбудар сакьюдар йигъартIан дар. Шаквал адар, му сечкйир вари жямяаьтлугъдиз важиблу ву, фицики ктагъу вакилари тялукь дережайиъди йишвариин али агьалйирин маракьар уьрхиди.

Вахтназ улихьна лазим серенжемар кьабул дапIну, Хив райондин ИК-йин кIулиъ айи Фридман Асваровди субут апIурайиси, дурар сечкйириз гьязур ву.
– Вари Урусатдиъси, Хив райондиъра 20-пи сентябри сечкйир кIули гъягъиди.
Улупнайи йигъан йишвариин сечкйирин ачухъвализ, сечкичйир артухъди жалб апIбан ляхниз асас фикир тувбаз аьхю мяна а.
Пуз ккундузузки, сечкйир ужуб дережайиъди гъягъбан бадали, гьарсар касди ватандихъан юкIв убгури ккунду.
Сечкйириз гьязурлуг’валикан гъапиш, Хив райондиъ вахтназ улихьна натижалу ляхин дубхна. Гьаци, сечкйир тешкиллувалиинди гъахбан бадали ТИК-дин бинайиинди администрацияйиъ 9 касдикан ибарат вуйи комиссия ляхник кипна. Хив райондин администрацияйин тялукь къарариз асас вуди, дидин иштиракчйир тяйин дапIна, ляхнин положение ва асас серенжемар тартиб дапIна.

 
Райондиъ сечкйир гъахбан бадали, 27 УИК-йиъ ляхин гъабхиди. Дураририкан 23 мектебарин ужагъариъ, 2 Кашкент ва Фурдагъ гъуларин культурайин ужагъариъ ерлешмиш духьна. Гьаму УИК-ариъ 161 касди сечкичйирихъди лазим ляхин гъабхиди.
Сечкйир ужуб дережайиъди гъахбан бадали, лазим гьязурлуг’валин уьлчмйир кьабул дапIнача: вари ужагъар материалинна техникайин алатарихъди тямин ву. ХатIасузвал уьбхбан месэлйиризра аьхю фикир тувра, – къайд апIура Ф. Асваровди.
Дугъан гафариан мялум шулайиганси, cечкйир гъахру ужагъар аьлава электрический акв тувру, аьлакьайин алатарихъди, компьютерарихъди ва дидихъди ттархьну гъюрайи принтерарихъди тямин апIиди. Халкьдин маракьар республикайин ва федеральный дережайиъди уьрхру депутатар ктагъбан сечкйириъ райондин УИК-арин вакилар гьарсар ватандашдихьна рукьуз чалишмиш хьиди. Сечкйирин комиссйирин дахилнаъ айи 161 кас вари чпин вазифйирихъди таниш ву. Сечкйириз гьязур шули, лазим вуйи вари серенжемар райондиъ уьмуми пландиз асас вуди тамам апIура.