Мейлан Нежефов
Гъябгъюрайи гьяфтайиъ ихь халкьди Ватандин Аьхю дяви ккудубкIну Гъалибвалин 80 йис хьувал къаршуламиш апIиди. Ав, фикир гъапIган, миржцIур йис цIиб вахт дар. Амма советарин халкьари гъийин ихь ислягьвалин йигъ, руг, хал, аьсрарииндира халкь бадали алдагъу ликар, гъизигу гаш’вал, бахтсузди адау йигъар ва йишвар, чпин жанар фида дапIну гъазанмиш гъапIу гъалибвал ухьу кIваълан гьархну ккундар. «ФужкIа гьархидархьа! ФукIа гьархидархьа!» – му дих гьарган ихь уьмриъ нумунади гъубзри, ва аргъаж шулайи наслариз мидкан дарс ибшри.
Аьхю гъалибвалик чан халис пай киву эскер Мирзаагъа Мирзаагъаевдин гьунарарикан ва уьмрикан дугъан хтул Сейфудин Мирзаагъаевди ктибтунзуз.
«Йиз эм Мирзаагъа 1916-пи йисан Кюре округдин Мажвгул гъулаъ бабкан гъахьну. Гьяйифки, миди вуйи ветеранарси, эмра чакан саб артухъ ктибтуз ккунир дайи. Я гъийин йигъаз дугъан сурат ва уьмрикан саб келимара китабариъ, газатариъ, журналариъ адар. Ккергъбан классариъ дугъу багъри гъулаъ гъурхну. Хъасин урхуб Зилдикк, ГъванчIил гъулариъ давам гъапIну. Яшар бегьем гъахьиган, Яракьлу Кьувватарин жергйириз гъуллугъ апIуз гъушну. Армияйиан гъулаз гъафир, цIиб вахтналан ихь Ватандиин хабарсузди фашистар алархьиган, дишла аьрза дибикIну чан хушниинди Ватан уьбхюз гъушнийи. Гьаци Новороссийск, Керчь хъана жара шагьрар ва гъулар гъаних душмнарихьан азад апIбан женгариъ иштирак гъахьну.
Чапхунчйириз мютIюгъ даршлу гъарзун хасият хъайи ич эм дявдин кьяляхъна йисари багъри гъулаъ «Уьру хяд» колхоздиъ, халачйир гьясил апIру фабрикайиъ жюрбежюр гъуллугъарихь лихури гъахьну. Дугъу чан уьмур багъри гъул’ан вуйи Нигар кIуру дишагьлийихъди ккабалгуру. Эмдихъди сабси бажийира гъул, хал бадали чан уьмур сарф гъапIну. Дугъу гъирагъдилан гъафи касар русвагь шлусдар халачйир сабдихъди саб гъядатIуйи.
Гъул’ан Дербент райондин Мамедгъалайиз чан хизан хъади кючмиш гъахьиган, эм хайлин йисари Н. Аьлиевдин ччвурнахъ хъайи совхоздиъ бригадирди гъилихну. Эмдиз «Уьру хяд», Ватандин дявдин орденар, «Москва уьбхбаз лигну», «Кавказ уьбхбаз лигну», «Жюрэтлувал улупбаз лигну» медалар а. Хъа грамотйирикан, гьюрматнан кагъзарикан улхурира дарза. 1975-пи йисан думу уьмриан гъягъюру.
Мирзаагъа эмди чан хпирихъди 4 бай ва кьюр риш дюн’яйиина духну, баркаллувалиинди арайиз адагъну, дурар тербияламиш ва эвленмиш дапIну, хизан-кюлфетдин эйсйир гъапIну. Гъи дурарилантина худлар, гудлар ва цIудлар духьна. Дурарин арайиъ мялимар, аьлимар, духтрар а.
Душман хъана ухь’ина алжагъурайиган, эмдин рюгьяр рази ктаури, Урусатди Украинайиъ гъабхурайи хусуси метлеб айи дявдин операцияйиъ дугъан худлар миллетчйирихъди женгариъ а. Гьяйифки, чан гъардшин ччвур али хтул Гьяжигъурбан 2022-пи йисан хусуси метлеб айи дявдин операцияйиъ талаф гъахьну. Ихь уьлкейиз Гъалибвалин йигъахъди сабси ислягьвалра ккун апIураза».
