Наргиз Гюлечова

Тахил

Гьаму йисан Дагъустан Респуб-ликайин гъулан мяишатдиъ гьясил апIурайи мягьсуларин кьадар 490 агъзур тоннайиинакьан за апIуз планариъ айиваликан региондин гъулан мяишатдин ва ипIру-убхъру сурсатарин министерствойин пресс-гъуллугънаан хабар тувра. Ккудубшу йисан республикайин хутIлариан уч гъапIу мягьсуларин кьадар 485,5 агъзур тонна вуйи.
Министерствойин пресс-гъуллугънан мялуматариинди, чвлин вазари гъурзу хутIларин кьадар 90 агъзур гектартIан артухъ, хьадукран вазари урзурайи хутIларин кьадар 233 агъзур гектартIан зина ву. Гъийин йигъаз думу кьадарнан гьацI пайтIан артухъ хутIлар дурзну ккудукIна.

Дюгю

Мялум вуйиганси, дюгю гьясил апIбаъ Дагъустан Урусатдин регионарин арайиъ гьелелиг 2-пи йишв’ин илми, хъа тIяаьмнан иццивалиинди, ухьухъ битмиш апIурайи дюгдихъ хъубкьруб саб региондикьан адар. Гьаци вуйивализ лигну, йислан-йисаз Дагъустандиъ ккадабцIурайи ицци дюгдин бегьернан кьадар артухъ апIбан зиин гъулан мяишатдин нежбрари аьхю зегьмет зигура.
Гъийин йигъаз айи мялуматариинди, республикайин 19 муниципалитетариъ дюгю гьясил апIурайи 140 мяишатарикан, саки гьацI пайтIан артухъ мяишатар дюгю убзбан ляхнарихъ гъюгъна. Цци республикайиъ 32 агъзур гектарин хутIлариъ дюгю убзуз планламиш дапIна.
Къайд апIуб лазим вуки, гьамусяаьт республикайиъ дюгю гьясил апIурайи мяишатарикан варитIан аьхю мяишат Къизлар райондиъ айи «Сириус» ООО ву. Мушваъ гьаму йисан 2 агъзур гектар хутIлариъ дюгю убзуз планламиш дапIна. Гъийин йигъаз гьадму кьадарнакан 500 гектар хутIлариъ дюгю убзбан ляхнар дапIну ккудукIна.

Багълар

Багъманчивалин циркилра Дагъустандиъ ужуди артмиш шула, ва ихь региондиъ Урусатдиъ йимишдин сурсатарин хатIасузвал уьбхбак лайикьлу пай кивра. Республикайиъ итрайи цIийи багъларин кьадар йислан-йисаз артухъ шула. Мисал вуди гъадабгъиш, аьхиримжи 4 йисандин арайиъ 5 агъзурна 300 гектартIан артухъ багълар кивна. Гьаддикан ккудубшу йисан кивдар 1 агъзурна 500 гектар ву. Хъа уч гъапIу яр-йимишдин бегьернан кьадар – 220 агъзур тонна гъабхьну.
Гъийин йигъаз Дагъустандиъ айи вари багъларин кьадар 30 агъзур гектар дубхьна ва Урусатдиъ яр-йимишар ужуди артмиш апIурайи 3 региондин арайиъ ихь республикара а.