Гюлягьмад Маллялиев
31-пи январиъ Республикайин образованиейин центриъ кIули гъубшу РД-йин Главайин гъвалахъ хъайи образованиейинна илимдин Советдиъ 2023-пи йисан Табасаран райондин образованиейин цирклиъ гъазанмиш гъапIу хъуркьуваларикан доклад хьади Табасаран райондин гимназияйин кIулиъ айи Элина Шихмягьямедова удучIвну гъулхнийи.
Дугъу докладдиъ къайд гъапIу бязи хъуркьувалар ва натижйир ктухуз ккундузуз. Сач райондин 90 педагогдиз федеральный ва региондин держайин гьюрматлу ччвурар тувну, 2 мялим Урусатдин президентдин премияйин, сар Дагъустандин главайин грантдин сагьибар гъахьну. «Бабан чIалнан ужурсир мялим» конкурсдин муниципальный этапдин гъалибчийи республикайин этапдиъ пешкешнан йишв гъазанмиш гъапIну. Райондиъ математикайин малимарин республикайин слет ва урус чIал кивру мялимарин республикайин семинар кIули гъубшну. Гьар йисан райондиъ профессор Зейдула Юзбеговдин ччвурнахъ математикайин олимпиада кIули гъябгъюру, ва дидин гъалибчйир 2-шубуд йигъазди пулсузди Москвайиз МГУ-йихъди таниш хьуз гьаъру. Райондиъ сач 6 мектебдиъ бинайиан расвалин ляхнар кIули гъухну, 8 «Точка роста» центрар ачмиш гъапIну, 4 мектебдиз автобусар тувну.
Хусуси метлеб айи дявдин операцияйин иштиракчйирин 175 бай-шуру хьадну лагерариъ рягьятвал гъадабгъну, дурариз машкврарихьна пешкешар тувну.
Райондин образованиейин цирклиъ айи камиваларикан улхури, Элина Шихмягьямедовайи образованиейин ери лазим вуйи дережайиъ адруваликан гъапнийи. Райондин 58 мектебдикан 30 мектебдиъ 100-тIан цIиб урхурайидар а, хъа 8 мектебдиъ – 16-лан 50-риина урхурайидар. Гьаддиз райондиъ интернат жюре мектебарихьна хътакувалин чарасузвал а.
Элина Шихмягьямедовайи чав регьбервал туврайи гимназийин бинайиин бажаранлу бицIидариз интернат ачмиш апIуз ккуниваликан ктибтнийи ва райондин кIулиъ айидаррира чпин разивал тувнайиваликан гъапнийи.
«Гъи мектебдин автобусдиъди гимназияйиз райондин 22 гъул’ан 102 бай-риш дарсариз хурача. Эгер урхурайидариз яшамиш шлу шараитар айи интернат ачмиш гъапIиш, райондин ярхла гъулариан вуйи бицIидарихьанра ужуб образование гъадабгъуз хьибди… Учуз тялукь дараматра ачуз. Думу 1970-пи йисари дагълу шубарин интернат ерлешмиш дубхьнайи дарамат ву. Думуган му интернатдиъ гьам Табасаран, гьам Хив, Гъяйтагъ ва жара районарианра шубари урхурайи.
Райондиан лазим вуйи сметайинна проектдин документацияра министерствойиз хъадапIнача. Аьхю хаиш вуйич увкан, Сергей Алимович, мектебарин капитальный расвалин ляхнар гъахру программайиз аьлава конкурсдин натижйир йивруган, Табасаран райондин гимназийин тереф уьбхюб», – гъапнийи Элина Шихмягьямедовайи.
Сергей Меликовди Табасаран райондиъ образованиейин цирклиъ кIули дубхнайи ляхниз ужуб кьимат дивнийи ва чан терефнаан Элина Шихмягьямедовайин теклифназ кюмек тувуз рази гъахьнийи.
