Наргиз Гюлечова
Урусатдиъ 20-пи апрель Ифи туврурин милли йигъ вуди къайд дапIну, цци 18 йис шула. Гьамдихъди аьлакьалу вуди улихьна йигъари республикайин сагъламвал уьбхбан министр Ярослав Глазовдин, Дагъустан Республикайин ифдин центрин кIулин духтрин заместитель Марина Кьурачевайин ва Урусатдин варитIан жигьил ифи тувру гьюрматлу кас Къурбан Багадзиевдин иштираквал ади, пресс-конференция гъабхьну.
– Гъи республикайиз фу вахтна лазим гъабхьишра, ишлетмиш апIуз гьубкIну ифи а. Ухьухь 15 агъзуртIан артухъ ифи туврайи касар гьисабназ гъадагъна. Гьаму кьадар донорари, вари сабишв’инди гьисаб гъапIиган, сач 37 агъзур ражари ифи тувну. ВартIан гизаф лазим шлуб 2-пи группайин ифи ву, фицики гизаф инсанарин гьендемариъ либхурайиб гьадму ву. Гьаддиз му группайин ифи ишлетмиш апIувалра гизаф ву», – гъапнийи республикайин сагъламвал уьбхбан министри пресс-конференцияйиъ.
Ярослав Глазовди хабар тувганси, кIурбарин маълин донорарин кьадар жигьатнаан Дагъустан гьамусяаьт Урусатдин кIакIначи регионарикан саб ву.
«Дагъустандиъ официально вуди кIурбарин маълин 11 донор а. Учу дурариинди дамагъ апIурача. Ккудубшу йисан кIурбарин маълин донорарин федеральный регистриз 14 агъзур дагъустанлуйир гъадагъну. Дурарин кьадар йислан йисаз артухъ шула», – мялум гъапIну министри.
КIурбарин маълин донор хьпан бадали гьапIну ккундуш, Республикайин ифдин центрин кIулин духтрин заместитель Марина Кьурачевайи ктибтнийи. Му жюрейин донорар хьуз ккуни касар, сарихъдикьан аьлакьа адарди, 4-5 йигъандин арайиъ хусуси ипIрубра туври, хусуси йишвариъ яшамиш хьуз гъитра. Гьадму йигъарин арайиъ дурарин ифи швнуб-саб ражари ахтармиш апIури, дидкан лазим вуйи компонентар ктагъуру.
22 йисандин яшариъ айи вахтна Урусатдиъ варитIан жигьил гьюрматлу донор гъахьи Къурбан Багадзиевди, учв фици му ляхнихьна жалб гъахьир вуш, ктибтнийи. Донорвалихьна дугъаз чан дадайи рякъ улупну. 6 йисандин арайиъ гъийин йигъазкьан Къурбну 94 ражари ифи тувна. Дугъу 200 ражари ифи тувуз кIури чан улихь метлебра дивна.
«Ифи тувуб – му ужуб ляхин ву. Инсанди саб ражари туву ифди 3 касдиз кюмек апIура. Гъи уву туву ифди закур аьзарлуйин уьмур уьбхюру. Гьаддиз ифи тувуз гьялак йихьай», – аьлава гъапIнийи Къ. Багадзиевди.
