Гюльнара Мягьямедова

РД-йин Ифдин центри Табасаран райондин кьялан больницайихъди сатIиди ифи тувбан акция кIули гъубхну.

Райондин агьалйириз му акцияйикан вахт ккимиди мялуматар тувнийи. Ифи тувуз ккунидар ЦРБ-йин сарикан тмунурикна тарагъру уьзрарин отделениейин дараматдихьна уч гъахьнийи.
Табасаран райондин агьалйир, райондин идарйирин ва тешкилатарин гъуллугъчйир, администрацияйин вакилар гьар йисан ифи тувбан акцияйиъ иштирак шулу. Ифдин центрин трансфузиолог духтир Шарифа Гьямзатовайин гафариинди, районариз душну ифи адабгъруган, заан гьисаб варж кас гъюри шулу. Хъа Табасаран райондиъ ифи тувуз ккунидарин кьадар лап гизаф гъабхьну. Гьаддиз саб вазлилан Центрин вакилар Табасаран райондиз хъана гъюбанди гъахьну.

Ифи адабгъбан метлеб Дагъу-стандин медицинайин тешкилатар ифдихъди ва ифдин сурсатарихъди тямин апIуб ву. Инсандиан ифи адабгъбан кьяляхъ, дид’ин марка алабсуру, адабгъу ифи Центриъ ВИЧ-1 ва ВИЧ-2 вирусар кайивализ ахтармиш апIуру.
Ифи туврудар духтрарихьна паспорт ва СНИЛС хьади дуфну ккунду. Ифи тувуз ихтияр аш аьгъю апIру суаларин кьяляхъ, инсандин гемоглобин ахтармиш апIуру.
Ифи тувуз 18 йислан 65 йис’инакьан яшар духьнайи сагъу инсандихьан шулу.