Зубайдат Шябанова
Гьаму йигъари Табасаран райондиъ Дишагьлийирин йигъахъди аьлакьалу вуди хайлин серенжемар кIули гъашну. Райондин глава Мягьямед Къурбановди Хючна Культурайин хулаъ райондиъ чпин ляхин вафалуди кIули гъабхури ва жямяаьтлугъ уьмриъ лишанлу гъахьи 13 дишагьлийиз гьюрматнан грамотйир ва пешкешар тувну. Думу йигъан райондин Культурайин хулаз уч духьнайи хайлин дишагьлийириз райондин культурайин цирклин вакилари маракьлу концертдин программа гьязур дапIнайи.
Концертдин тешкилатчйири хусуси метлеб айи дявдин операцияйиъ иштирак шулайи эскрарин бабарра кIваълан гьаундайи. Табасаран райондин дишагьлийирин советдин председатель Айханум Рашидовайи ич сюгьбатнаъ ктибтганси, думу учв, Табасаран райондин Жямяаьтлугъ палатайин председателин заместитель Айваз Рамазанов ва Табасаран райондин ЦБС-дин кIулиъ айи Рафик Аьлиев хусуси метлеб айи дявдин операцияйиъ саб хизандиан 3-тIан артухъ эскрар иштирак шулайи 8 хизандин бабариин улукьуз гъушну.
«Дюзди гъапиш, му акция гъабхури цци шубудпи йис вуйич. ИкибаштIан, сад йигъан райондин вари бабарихьна гъягъюз шулдар, гьаддиз учу гьар йисан саб терефназди гъягъюз йикьрар гъапIунча. Цци учу Дагъни гъулан, хусуси метлеб айи дявдин операцияйиъ 4 велед иштирак гъахьи Калимат Аьбдуллаевайихьна, Хючна гъул’ан вуйи, хусуси метлеб айи дявдин операцияйиъ 4 велед ва сар хтул айи Сейбат Байрамовайихьна, Акъа гъул’ан вуйи, хусуси метлеб айи дявдин операция ккебгъхъанмина душваъ 7 бай ва 6 хтул иштирак духьнайи Угълангерек Гьяжиибрагьимовайихьна (гьамусяаьт дугъан 3 бай, 6 хтул ва язна дявдиъ а), ЖагътIил гъу’ан вуйи, 4 бай ва 3 хтул хусуси метлеб айи дявдин операцияйиъ айи Эспет Ханмягьямадовайихьна гъушунча. Эспет халайин сар хтул гъубшу йисан ва кьюб гьяфта улихьна кьюрпи хтул дявдин женгариъ кечмиш гъахьну. Думу худлар Эспет халайи чав гъюрхдар вуйи.
Гьацира думу йигъан учу ЖагътIил гъулан сабсана хизандиин улукьнийча. Сейбат Наврузовайин 4 бай хусуси метлеб айи дявдин женгариъ а. Сейбат хала кечмиш гъахьиб учуз мялум дайчуз. Дугъан жилир Тураб халуйи ва хулаъ айи швушвари учу маниди кьабул гъапIнийи. Хъа ХъюртIил гъул’ан вуйи Къизтамал Гьяжиаьгьмадовайинра 3 бай хусуси метлеб айи дявдин операцияйиъ айи. Улихьнаси дугъан сар бай кечмиш гъахьну. Дурарин хизандиинра улукьнийча.
Арак гъулан Бике Сеферовайин кьюрид баяр офицерар ву. Дурари дявдин операция ккебгъу сабпи йигъхъанмина варитIан гъагъи женгар гъягъюрайи йишваъ гъуллугъ гъабхура. Думу баб Дишагьлийирин йигъан тебрик дарапIди гъитуб дюз гъюрадайи.
ТIаттил гъулан агьали Багьарат Мягьямадовайин шубур бай хусуси метлеб айи дявдин операцияйиъ а. Му бабахьнара гъушунча.
Му акция кIули гъабхуз ва пешкешар ва кюкйир хьади бабариин улукьуз пулин кюмек асас вуди Айваз Рамазановди гъапIнийи. Дугъаз аьхю чухсагъул», – гъапнийи сюгьбатнан аьхириъ Айханум Рашидовайи.
Дугъан гафариинди, му рягьимлувалин акция дурари гъюру йисарира давам апIиди.
