Умгьанат Сулейманова
Гъубшу гьяфтайи, 21-пи феврали, Дербент шагьриъ В.А. Эмировдин ччурнахъ хъайи кадетарин интернат-мектебдин гьяятдиъ, душваъ урхури гъахьи Нариман Шихялиевдиз ядигар ачмиш гъапIну.
2025-пи йисан 2-пи июли, Курский областдинна Украинайин сяргьятариин чан эскервалин буржи тамам апIурайи ихь ватанагьли, подполковник Нариман Шихялиевдин уьмур душмандин гюллди кьатI гъапIну. Нариман Шихялиев ва дугъан ижми дуст, Урусатдин дявдинна гьюлин флотдин кIулиъ айирин заместитель, генерал-майор Михаил Гудков, 2022-пи йисан 24-пи февралихъанмина ДНР ва ЛНР республикйир, Херсонский ва Николаевский областар, Херсон ва Мариуполь шагьрар азад апIури, чпин хиликк ккайи дестйирихъди гъизгъин женгариъ иштирак гъахьну. 2024-пи йисан украинайин гъачгъар Курский областдиин хабарсузди алархьу вахтна командованиейи Михаил Гудков ва Нариман Шихялиев чпи идара апIурайи дестйирихъди ватандин жилар миллетчйирихьан азад апIуз гьаъру. Эскрарихъди заан дережайин женгнанна ватанпервервалин тербияйин ляхин гъабхбаз ва швнуб-саб ражну миллетчйирин алжагъбар дерккбаъ гъазанмиш гъапIу хъуркьувалариз лигну, Урусатдин оборонайин улихьдин министр Сергей Шойгуйи Нариман Шихялиевдиз дугъан ччвурнахъ вуйи яракь тувну, думу кьюб ражари Кьягьялвалин ордендиинди, «Ватандин улихь лишанлу хьпаз лигну» II дережайин ордендиинди, «Дирбаш’вализ лигну» медалиинди лишанлу гъапIну. Улихьна йигъари дугъаз шубубпи Кьягьялвалин орден тувну – гьяйифки, йикIбалан кьяляхъ.
Серенжемдиъ Дагъустан Респуб-ликайин глава Сергей Меликов, Урусатдин Игитар Темирлан АбутIалимов, Энвер Набиев, Дербент шагьрин кIули айи Ханлар Пашабегов, шагьрин жямяаьтлугъ тешкилатарин вакилар, СВО-йиъ гъийиху эскрарин абйир-бабар, Шихялиевдин багахьлуйир, дустар, кадетарин интернат-мектебдин мялимар ва душваъ урхурайидар иштирак гъахьну.
Нариман Шихялиевдин гьюрмат уьбхбаз бахш дапIнайи мяракайиъ Дагъустан Республикайин глава Сергей Меликов удучIвну гъулхнийи. Чан улхбаъ дугъу дирбаш офицерин игитвал, гьунарлувал къайд гъапIнийи.
«Гьюрматлу ватанагьлийир, гъи ихь республикайин хайлин агьалйири ихь Ватандин азадвал, инсанарин бахт бадали, чпин жанар фида гъапIну. Магьа гъи ухьу кIваин апIурайи кьюр игит эскер, кадетарин интернат-мектебдиъ гъурху Нариман Шихалиев ва Урусатдин Игит Муслим Муслимов, ва гьацира ихь имбу эскрар гележегдин наслариз нумуна вуди гъузди.
Дупну ккундуки, СВО ккебгъхъанмина табасаранарин арайиъ юкьур Урусатдин Игит айивалиинди учвхьан дамагъ апIуз шулучвхьан. Гъи дурарихъди сабси хайлин эскрарира женгнан гьяракатариъ аьжайибнан игитвал ва кьягьялвал улупура. Дурарин цIарнаъди Нариман Шихялиевдин гьунарар ухьу гьарган кIваинди гъитну ккунду. Аку гележег бадали чан уьмур фида гъапIу гьамцир дирбаш бай тербияламиш апIбаз лигну, дугъан адаш Шамсутдин ва дада Гюлизар Шихялиевариз аьхю чухсагъул пуз ккундузуз», – гъапну Сергей Меликовди.
Серенжемдиъ Нариман Шихяли-евдин хпир Елизавета ва риш Камила иштирак гъахьнийи. Камилайи чан адашдиз бахш дапIнайи шиир гъурхнийи.
Серенжемдин официальный пай ккудубкIбалан кьяляхъ уч духьнайидари, саб дакьикьайиъ ккебехъбиинди, Нариман Шихялиевдин гьюрмат гъюбхнийи. Хъасин дугъан ядигарихъ аа Урусатдин Игит Муслим Муслимов кIваинди уьрхбан тахтайихъ кюкйир дивнийи.
