Мейлан Нежефов
Ухьуз мялум вуйиганси, аьхиримжи йисари ихь республикайиъ коррупцияйихъди женг гъабхбан серенжемар кIули гъахура. Ккудубшу гьяфтайи меркездиан коррупцияйиз аькси женг гъабхру комиссия Хив райондизра хъубкьнийи.
Делегацияйи, райондин администрацияйиъ хялар кьабул апIру кабинетдиъ дусну, тамам саб гьяфтайин арайиъ ахтармиш’валин ляхнар кIули гъухнийи. Гьаму вахтнан арайиъ дурари райондин вари йицIийирхьуб поселенйирин администрацйирин, гьадму поселенйирин мектебарин, бицIидарин багъарин, ФАП-арин, культурайин хуларин ва райондин жюрбежюр тешкилатарин ва карханйирин сабпи нубатнаан лазим вуйи ва гьерхну ккуни кагъзарилан ул алдабтуз хъуркьнийи.
Делегацияйин кIулиъ айи Мазанай Мазанаевди ахтармиш’валин ляхнарикан чан фикрар ачухъ апIури, райондин гъуллугъчйириз гьамци гъапнийи:
«Гьюрматлу дустар, фикир мапIанай, учу учвуз гучIар ккауз, ясана жара кьастар ади дуфнайидар ву кIури. Ваъ. Дугъриданра, миди вуйи районар – шагьраризси, учу учвухьнара гъюбан себеб сифтена-сифте учвуз, учву апIурайи ляхниз кюмек тувуб вуйич. Гьелбетда, вари аьгъюр ва вари удукьрур даршул, гьаддиз учуз хайлин суалар алахьура, дурар гьял апIури швнуд-сад йис вуйич. Ич метлеб думу аьгъювалар учвухъди пай апIури, аьхиримжи хьуд йисандин арайиъ духьнайи гъалатIар дюз алауб вуйич. Ичв устадвалиан саб фукIа цIийиб аьгъю хьуб учуз мумкин ву. Гьаддиз мушваъ аьйиб адар. Аьйиб гьаддиъ аки, мялум даруб гьедрерхди, ахтармиш дарапIди, йисариинди иликIну гъузри хьуб. Ихь гахтармишарин кьяляхъ учу ич идарайиъра дапIну ккуни ляхнар а. Гьаддиз натижйир йивуз, гьелбетда, учузра сацIиб вахт ккунду. Намус ва баркаллагь дукIну гъягъяйиз гъадабгъну ккун.
ИкибаштIан, узу узу вуза кIури, къанунди улупнайибра чаз ккуниси ккабалгну, шулугъ кади ва даш-баш гъадабгъури ляхин-кар апIурайир ихь арайиъ алалахъри, хъа алахъиш, дугъаз гюн тувидархьа. Ухьуз гьаруриз ихь апIурайи ляхникан сифтена сифте аьшкь ибшри. Гьаци гъабхьиш, жвуван ччвурра марцциди гъубзди ва халкьдин терефнаан гьарган жвуваз заан кьимат ва гьюрмат хьибди. Хъа дидихъди гъюруб жил’ин фукIа адар».
