Зубайдат Шябанова
Гьюкуматдин аьхиримжи имтигьнин (ГИА) тешкиллувал тямин ва мялуматар тартиб апIру Региондин центрин улупбариинди, цци Дагъустандиъ 12 571 касди ЕГЭ-йиъ иштирак хьуз аьрза дибикIна.

 

Имтигьнар ва натижйир

2024-пи йисан имтигьнарин асас кампания майдин 23-пи йигълан 1-пи июлиз давам хьибди. Цци Дагъустандин выпускникари имтигьян тувуз асас вуди кадагънайи хьуб предмет гьамрар ву: биология – 4650 касди, химия – 4261 касди, обществознание – 4123 касди, математика (профилин) – 2480 касди, тарихдин дарс – 2072 касди.
Вари уьлкейиъси, Дагъустандиъра майдин 28-пи йигъан урус чIалнаан ва 31-пи майди математикайиан ЕГЭ гъабхьну.
Урус чIалнаан республикайиъ образованиейин идарйирин бинайиин тешкил дапIнайи 64, сагъвалин гъагъи гьялнаъ айидариз хулариъ вуйи 5 ва УФСИН-дин бинайиин тешкил дапIнайи 3 пунктариъ 10 952 касди имтигьнар тувну.
Урус чIалнаан вуйи ЕГЭ 11-пи классдин аттестат гъадабгъуз туврайи кьюб асас имтигьнарикан саб ву. Аттестат гъадабгъбан бадали, имтигьниъ му предметдиан 100 балликан асккан гьисаб 24 балл гъадагъну ккунду, хъа отлично кьиматназ 70 ва артухъ балл улупна. Урус чIалнан имтигьнин натижйир вари вузариъ гьисабназ гъадагъура. Хъа вузарик кучIврудари думу имтигьниан 36 балл ва артухъ гъадагънади ккунду. Му имтигьниан натижйир июндин 14-пи йигъан ашкар хьиди.
Майдин 31-пи йигъан республикайин выпускникари математикайин предметдианра гьюкуматдин аьхиримжи имтигьян тувну. Му имтигьян кьюб йишваз пай дапIна – профилин ва бинайин дережйириз. Аттестат гъадабгъбан бадали выпускникари бинайин имтигьниъ, хъа вузарик кучIврайидари – профилин дережайин илчIихбариъ улупнайи табшуругъар асккан гьисаб 27 баллиз гьял дапIну ккунду.
Гьаци Дагъустандин 2132 выпускникди 3 сяаьтна 55 дакьикьайи профилин математикайиан, хъа 8951 выпускникди 3 сяаьтна бинайин математикайиан ЕГЭ тувнийи.
Выпускникариз математикайин имтигьниан чпин натижйир июндин 14-пи йигъан аьгъю хьиди.
Думу имтигьниъ иштирак хьуз дархьидариз ва гьацира шубубдизкьан тувуз дархьидариз нубатнан ражари 20-пи ва 21-пи июндин аьлава йигъари чпин имтигьян тувуз мумкинвал хьибди.
Гъийин йигъаз мектеб кку-дубкIурайидари географияйиан, литературайиан ва химияйиан (23-пи майди), обществознаниейиан ва физикайиан (4-пи июнди) имтигьнар тувна. Харижи чIаларин, биологияйин, тарихдин ва информатикайин имтигьнар гьеле тувуз ккими.

 

9-пи классдин выпускникар

Мектебариъ 9-пи классдин выпускникари уьмуми образование гъадабгъувал тасдикь апIбан бадали, образованиейин программайиъ гьюкуматдин аьхиримжи кьюб имтигьян улупна. Дурар урус чIалнан ва математикайин предметарин имтигьнар ву.
Июндин 3-пи йигъан 9-пи классдин выпускникари урус чIалнаан ОГЭ тувну. Республикайиъ думу имтигьян тувру кампанияйиъ 44 273 урхурайир иштирак гъахьнийи. Имтигьян тувуз мектебарин бинайиин 149, хъа иццру бицIидариз – кьюбсана хулаъ пунктар гьяракатнаъ ирчнийи.
Имтигьнарин табшуругъар кайи ляхнар шубуб пайнакан ибарат вуйи. Дурариъ 13 табшуругъ тувнайи. Думу табшуругъар тамам апIуз 3 сяаьтна 55 дакьикьа вахт улупна. 9-пи класс ккудубкIбан аттестат гъадабгъбан бадали, урхурайир думу имтигьниъ ас-ккан гьисаб 15 балл гъазанмиш дапIну ккунду. Думу йигъан имтигьниъ жюрбежюр себебариан иштирак хьуз дархьидарихьан 24-пи июндин аьлава йигъан ОГЭ тувуз шулу. Хъа имтигьнин натижйирихъди выпускникар ва дурарин абйир-бабар 18-пи июнди таниш хьиди.
9-пи классдин выпускникари 6-пи июнди математикайин имтигьян тувну.