Умгьанат Сулейманова
Газатдин «Хусуси метлеб айи дявдин операция» рубрикайиккди сарсан ихь ватанагьлийихъди газат урхурайидар таниш апIурача. Гъийин макьалайин игит Табасаран райондин ТIивак гъулан агьали Алавутдин Шихялиев (шиклиъ) ву. Чан гьарйигъандин дявдин гъайгъушнарикан ктибтбан бадали гаф Алавутдиндиз чаз тувдихьа.
«2022-пи йисан 24-пи февралиъ узу гъуллугъ апIурайи Ростов шагьриъ ерлемиш дубхьнайи ич частнан пияда полкназ, ДНР ва ЛНР халкьдин республикйир Киевдин зулмиккан азад апIбан бадали, Украинайин аьтрафариина гъягъуз буйругъ тувнийи. 25-пи февралиъ ич полк Луганский областдин терефназди рякъюъ убчIвнийи. Луганский областдиъ чюлиъди гъя-гъюрайи ич танкарин дивизияйин жергейиз нацистари артиллерияйиан йивуз хъюгъю. Танкарин жергейиъ кьяляхъди гъюрайи, йиз танкра кади, юкьуб танклиз зарар гъабхьнийи. Имбу танкар, затра дийийигъди, гьяракатниинди улихь гъушнийи – дурариз дугъужвуз ихтияр адайи. Учу, цIа кабхъу танкариъ айи 18 кас, зийнар гъахьидарра гъадагъну, багахь хьайи ярквразди архьунча. Ужуб йиф айи вахт вуйи… Гьамус гьапIру? Саб уьдюбхънайи ичI алабхъунчуз. Фу лигурва, му ичIра нацистаринуб вуди гъабхьну…
Думу йишван сенграриъ йифуъ амича. Ва кьюд йигъандин арайиъ, нацистарихьан жин шули, ихь эскрар гъушу рякъяр агури, яваш-явашди жвувандарихьинди алдахъунчу.
Спецоперацияйин садпи йигъари Украинайин кьушмарин терефнаан йивувалар гизаф гъахьну. Гьацдар вахтар гъахьнийички, йигъну душмнарихъди женгариъ, хъа йишвну вари сикин гъахьиган, дявдин палат аьдати палтариз гьюдюхну, ихь гъи-йиху жигьил эскрарин майтар уч апIуз гъягъюри шуйча. 2022-пи йисан 19-пи апрелиъ йишвну ич улихьди гъягъюрайи эскер, минайиин лик алабхъну, гъакIнийи, гъутIубкIу минайин тикйир кIулик куркIну, йизра контузия гъабхьнийиз.
Сифте Луганскдин Халкьдин республикайин кьушмарин аьзарханайиъ имиза, хъасин Ростовдиз, хъа гьадлин Москвайиз гьаънийзу. Гьадушваъ саб вазли зийнар сагъ дапIну, гъулаз отпускдиз гъафнийза. Гьамусяаьт Донецкдин Халкьдин республикайиъ саб гъулан багарихь женгариъ ача», – ктибтнийи узуз телефондиан эскри.
Шихялиев Алавутдин Багьутдинович 1992-пи йисан ТIивак гъулаъ бабкан гъахьну. Мектеб ккудубкIну, Алавутдин чан эскервалин буржи тамам апIуз армияйиз гъягъюру. 2012-пи йисан контракт йибтIну, дугъу Тула шагьриъ ерлемиш дубхьнайи частнаъ 6 йисан гъуллугъ гъапIну, хъасин Ростовдиъ айи дявдин частназ гьафну.
Шихялиеварин хизандиъ Алавутдин аьхюрсир велед ву, дугъан кьяляхъ шубур чи бабкан гъахьну. Дупну ккундуки, Багьутдин ва Гюльселем Шихялиевари, Алавутдин хизандиъ айи сар жили велед вушра ва дугъхъан гьарган чпин юкIв убгурашра, бали чан уьмур яракьлу кьувватарихъди аьлакьалу апIбан мясляаьтназ къаршу гъахьундар.
«Ав, жан бай, Ватан уьбхюб гьарсар жилижвуван буржи ву», – кIура дурари.
Гьамусяаьт Алавутдин Шихялиев кьушмарин дестейин командирра духьна. Дугъаз улихьнаси «Дявдин женгариъ дирбаш’вал улупбаз лигну» медальра тувну. Хъа багарихьди Жуковдин медаль тувуз кка.
