«Йисандин баб» гьюрматлу ччвурназ, газатдин коллективдин мясляаьтниинди, Хив райондин Гъвандикк гъул’ан вуйи Гьясанова Угълан Мирзабеговна лайикьлу гъахьну. Дугъан яш 103 йис ву. Угълан баб Гъвандиккна Ккувигъ гъул’ан швуваз хъаънийи. Дурарин хизандиъ велед гъахьундайи. Хъа чан жилирин эм кечмиш гъахьиган, Угълан Мирзабеговайи йитим гъахьи веледар багъридарси гъюрхну ва вари эвленмиш гъапIну.
«Ав, яшар духьнайиз. Амма узу я жигьил вахтна, я гьамусяаьт сад йигъанкьан дилихри гъузу дишагьли дарза. 40 йисантIан артухъ халачйир урхури артилиъ, 15 йисантIан артухъ аьхюну дояркади гъулан колхоздин фермайиъ, 12 йисан мектебдин гъаравулди гъилихунза. Хулаъра мал-къара уьбхюйча. Фермайин 15-18 хюни ктарди, ич кьюб хюни ва кьюб гамуш ккудурзуйза», – гъапнийи Угълан бабу. Думу гъира ляхин адарди гъузудар – бистниъ мейвйир кивра, пеэр-шюхъяр уьрхюра гьюри-перийин лишнар кайи Угълан бабу.