Табасаран ва Хив райондиъ туризм артмиш шулайивалихъди аьлакьалуди ихь халкьдин арайиъра хайлин касар экскурсйир гъахру пишекрар духьна. Хъа учу цци гьаму номинацияйиъ сабпи йишв ЧвулатI гъулан агьали, урус чIалнан ва литературайин мялим Алим Гюлевдиз тувуз йикьрар гъапIунча.
Думу цци Москвайиъ ВДНХ-йин аьтрафариин 10 йигъандин арайиъ – 11-пи ноябриан 21-пи ноябриз – «Урусат» выставка-форумдиз дуфнайидариз экскурсйир гъахрурди гъилихну. Му ляхниз дугъаз «Урусат мумкинвалар тувру уьлке ву» президентдин платформайин кIулиъ айидари дих гъапIнийи. ВДНХ-йиъ Алим Гюлевди гьар йигъан кьюб-шубуб ражари 2-3 сяаьтдин давамнан экскурсйир гъахури гъахьну.
Алим Гюлевди аьхиримжи кьюд йисандин арайиъ багъри Табасарандиъра туристариз аьдати экскурсйир, хъа аьшкь айидариз, Табасарандин уткан йишварикан, шаир ва эскер Кьалухъ Мирзайин уьмрикан ктибтури, онлайн-саягънииндира экскурсйир гъахура. Думу кьюб ражари «Йиз уьлке йиз Урусат ву» проектдин экспертра гъахьну.
Дидланра савайи, Алим Гюлевди табасаран халкьдин жямяаьтлугъ уьмриъ жанлу иштирак’валра улупура, аргъаж шулайи наслиз ватанпервервалин тербия тувбак чан лайикьлу пай кивра.