2023-пи йисан 21-пи мартдиъ Мягьячгъалайиъ Р. Гьямзатовдин ччвурнахъ хъайи Республикайин милли библиотекайиъ Хив райондин ГъуштIил гъулан агьали, художник Экпер Мягьямедкеримовдин кIул’инди вуйи выставка гъабхьну .
Ихь ватанагьлийин сабпи выставка 2017-пи йисан Хив гъулаъ, хъа кьюбпи выставка 2018-пи йисан Мягьячгъалайиъ Аварарин музыкайинна драмайин театриъ кIули гъубшнийи. 2020-пи йисан Дербентдиъ Нарын-гъалайиин «Халкьдин художествойин сяняаьткарвалин йигъ» фестивалин дахилнаъди Экпер Мягьямедкеримовдин «Ватандин рангар» кIуру выставкара тешкил гъапIнийи.
2022-пи йисан Москвайиъ Урусатдин халкьарин аьдати культурйирин йисандин дахилнаъди Экпер Мягьямедкеримов Дагъустандин халкьдин яратмишарин хулу тешкил дапIнайи «Дагъустандин багьалу тикйир» проектдин художникарихъди сатIиди вуйи выставкайиъра иштирак гъухьну.
Дугъу гъизигу шиклар, дагъустанлуйи-ринси, ихь ва жара уьлкйирин хусуси касарин хулариъра а. Дурариз пишекрари кIурайиганси, «аьхирижми вахтна ихь жямяаьтлугъдин арайиан дубграйи нач кайивал, кIваъ зат чIуруб адрувал хас ву».