«Йисандин игит» номинацияйиз лайикьлу жюрэтлу баяр ихь ватанагьлийирин арайиъ цци гизафдар гъахьну.
2022-пи йисан февралихъанмина давам шулайи хусуси мяна айи дявдин операцияйиъ ургуд агъзурилан зиина табасаран баяр Ватан бадали, ихь веледарин гележег бадали украинайин миллетчйирихъди ва милитаристарихъди гъати женгариъ а – сар тмунуртIан жюрэтлу, кьягьял вуйидар. Дурарин арайиъ, контрактдин йикьрар йитIну айидарси, Ватандин улихь чпин буржи гьисс апIури, жвуван хушниинди душнайидарра а.
ВаритIан гъагъи ва читин шартIариъ инсандин удукьувалар артухъдиси ачухъ шулу. Ав, дявдин гъагъи шартIариъ чпин рюгьнан ва кьушнан мюгькам диривал улупурайи ихь игит баяриинди дамагъ апIурахьа! Дурарин арайиъ Урусатдин Игит заан ччвурназ лайикьлу гъахьи шубур дирбаш кас ва, чпин гьунарариз лигну, орденариинди ва медалариинди лишанру дапIнайи эскрар гизаф а. Гьяйиф, дурарин арайиъ гьацира Ватан бадали чпин жанар гъурбан гъапIу игитарра а – Аллагьдин рягьматдикк ишри чпи. Думу игитарин ччвурарси, дицдар вафалу веледар тербияламиш гъапIу абйир-бабарра гьаммишандиз аьхю гьюрматниинди кIваинди гъитдихьа.
«Йисандин игит» номинацияйиз хусуси мяна айи операцияйин женгариъ иштирак шулайи ихь табасаран баяр-шубар вари лайикьлу ву кIури, гьисаб апIурача. Гъит улубкьурайи йисан, ислягьвал баян дубхьну, ихь вари эскрар, гъалибвалра хьади, сагъ-саламатди багъри ватандиз жвуван хизанарихьна хъадакну гъюри!