Табасаран халкьдин бабан чIалнахъди, тарихдихъди аьлакьалу ва культурайин цирклиан фуну жюрейин серенжемар кIули гъахурушра, Табасаран райондин ТIаттил гъулан агьали, Дагъустандин Халкьдин Игит Айваз Рамазановди чан пай кидривди гъитудар.
Му жумарт касди рягьимлувалин цирклиъ ляхин апIури саки 30 йистIан артухъ ву. Гьарйисан, бицIидарин ва инвалидарин йигъарихъди аьлакьалу вуди, гьацдар бицIидар уч дапIну, дугъу дурариз шадлугънан серенжемар тешкил апIура ва пешкешар тувра. Гьацира, Дербент шагьриъ яшлу касар айи хулазра кми-кмиди гъягъюри, дураризра хайлин кюмекар апIура.
Къайд дапIну ккундуки, гьар йисан газатарин ва журналарин подписка гъябгъру вахтна, бабан чIалниинди чапдиан удучIвурайи «Табасарандин нурар» газат, «Литературайин Табасаран», «Дагъустандин дишагьли» ва «Ппази» журналар, сарпирди улихь гьучIвну, чан дустаризра теклиф апIури, саб кьадар касариз чан терефнаан кюмек вуди подписка апIура.