Мейлан Нежефов
Вари Урусатдиъси, Хив райондиъра 2024-пи йисан 14-пи февралиъ 251 выпускникди чпин уьмриъ сабпи имтигьян тувну. Имтигьяндиз дахил шулайи юкьуб табшуругъдикан гьарсабдиз 15-16 дакьикьа улупна. Вари табшуругъар дюзди гьял гъапIиш, 20 балл гъазанмиш апIуз шулу. Хъа зачёт гъадабгъбаз 10 баллра чIяаьн шула.
Чпи имтигьян фици тувнуш ахтармиш апIури, узу райондин мектебариъ урхурайи выпускникарихьна илтIикIнийза. Дурарин жавабар жи-къиди газатдин машнаъ чап апIурача.
Фатима Юзбегова, Гъвандккарин кьялан мектебдин урхурайир: «Йиз уьмрин сабпи имтигьяндихьна узу сентябрь вазлихъанмина гьязур шулайир вуза. Фицики, 9-пи класс ккудубкIиган, имтигьнарихьна деетуб гьаму урус чIалнаан вуйи зачётдилан асиллу дубхьна. Гьаддиз мид’ин хилар хъержвну лихури гъахьунза. Мектебдиъ жвуван таярихъди ва мялимдихъди, хулаъра интернетдиъ гьар вазли тIаърайи цIийи вариантар сабра ккадаури гъахьундарза. Гьарсаб вариантдихьна гьязур шлу дарс гъи Ютубдиъ а. Гьамци жвуваз хайир кади ишлетмиш гъапIу интернетди гъи магьа натижайиъ саб манигъвалра адарди имтигьяндиан зачёт гъадабгъуз кюмек тувунзуз».
Нурислам Аьбдуллаев, Мажвгларин кьялан мектебдиъ урхурайир: «Узу мектебдиъ гъи юкьбар-хьубариз урхураза. Иштагь ади урхуз аьхю бабан гафари кьувват тувразуз: «Эгер имтигьнарихьан гучIури, ул хьаш, урчIвубпи классдихъан саб колледждик кучIвну, яв мадар апIин сарун. Дарш, йицIисабпи класс ккудубкIну заан аьгъювалар гъадагъуз чалишмиш йихь». Гьаци вуйиган, Аллагьдин амриан, 11-пи классдихъан урхуз кучIвуз фикир апIураза. Ич мялимдин гафариинди, узу гъийин имтигьян ужуди тувну. Миди хъана узук урхуз юкIв капIра».
Эльвира Сагидова, ГъуштIларин кьялан мектебдиъ урхурайир: «Урхуб гьарган заанди дибисназа. Гьаз гъапиш дурхну хилиъ диплом айи кас сабанкьан швумал шулдар. Дугъаз гьарган вари терефарихъанди рякъяр ачухъ шулу. Гьелбетда, фукьан ужуди урхурашра, имтигьяндихьан гучI дарди даршул. Вушра узуз, я камерайихьан, я имтигьяндин гидишат бикIурайи камерайихьан гучI гъабхьундарзуз. Мидин жини сир гьаддиъ аки, вари жвуван таниш вуйи баяр-шубар ва мялимар жвувахъди сабхилди хъа. Дурарин юкIв капIру гафари варибдиин гъалиб хьуз кьувват туври гъахьунзуз».
Заира Жяфарова, Хиварин кьялан мектебдиъ урхурайир: «Мялимари гьарган кIури шулзуз: «Ужуйи дурурхиш, фамилияйиз гаф гъюруб гъапIиш, яв абайин рюгьяриз аьян шулу, Заира». Гъи мектебдиъ ужуйи урхуб йиз заан буржйирикан саб ву. Табасаран литературайин биначи, вари аьламдиз машгьур вуйи шаир Абумуслим Жяфаров йиз аьхю аба ву. ИкибаштIан, думу тухум-тарайизси, узузра нумуна вузуз. 9-пи классдиз удучIвхъанмина гьар гьяфтайи кьюбан му имтигьяндиан ляхин апIури гъахьунза. Гъавриъ дархьиб мектебдиъ мялимдихьан ва классдиндарихьан гьерхри шуйза. Гьаддиз имтигьяндиъ саб артухъ узуз читинди алабхъуб фукIара адар. ЮкIв гъабхьиган, вари тамам апIуз шулу».
Гъит ихь выпускникарин кIваъ айи ужудар хайирлу мурадар тамам ишри.
