Гюльнара Мягьямедова
14-пи апрели Дагъустандин региондин «Кьибла Дагъустандин жигьиларин союз» жямяаьтлугъ тешкилатдин меценат ва жямяаьтлугъдинна политикайин вакил Мамед Аьбасовдин пулин дакьатарин кюмекниинди Дербент шагьриъ СтIал Сулеймандин ччвурнахъ хъайи Гьюкуматдин лезги театрин дараматдиъ Кьибла Дагъустандин уьмуми образованиейин мектебариъ урхурайидарин «Дагъустандин отличникар» кIуру слет кIули гъубшну.
Жямяаьтлугъдинна политикайин деятелари, РД-йин Халкьдин Собраниейин депутатари, муниципалин ва шагьрин округарин главйири, спортсменари, культурайин гъуллугъчйири, мектебариъ урхурайидарин абйир-бабари ва мялимари пай киву слетдиъ отличникариз пулин пешкешар, Союздин гьюрматнан грамотйир, РД-йин образованиейин ва илимдин министерствойин чухсагъул мялум апIру кагъзар ва жара багьалу пешкешар тувнийи.
Слетдин дахилнаъди Кьибла Дагъустандин 12 муниципалитетдиан – Агъул, Ахцигь, Дербент, Докъузпара, Къурагь, Мягьярамкент, Рутул, СтIал Сулейман, Табасаран, Хив районариан, Дербент ва Дагъустандин Огни шагьрариан мектебариъ урхурайи 12 касдиз пешкешар тувнийи.
Серенжемдин метлеб бажаранвал кайи бицIидарин артмиш’вализ артухъди фикир тувуб, мектебдиъ туврайи аьгъюваларин ва тербияйин месэлйирихьна жямяаьтлугъдин ва абйир-бабарин фикир жалб апIуб вуйи.
Слет меценат Мамед Аьбасовди ачмиш гъапIниийи, дугъу уч духьнайидарин адресназ насигьятнан гафар гъапнийи, гьацира гьаму жюре серенжемар гъахбан ва жигьилариз кюмек апIбан важиблуваликан ктибтнийи.
Уч духьнайидарин улихь Кьибла Дагъустандин жигьиларин союздин кIулиъ айи Равидин Аьбдурягьимовра удучIвну гъулхнийи. Дугъу, отличникарина дурарин абйир-бабари ва мялимари зигурайи зегьметназ чухсагъул мялум апIури, гележегдиъ дурариз хъана заан хъуркьувалар ккун гъапIнийи.
Серенжемдиъ хяларди дуфнайи РД-йин Халкьдин Собраниейин председателин заместитель Юрий Левицкий, РД-йин милли политикайин ва диндин ляхнарин министр Энрик Муслимов, Табасаран райондин глава Мягяьмед Къурбанов ва гь.ж. иштирак гъахьнийи. Республикайин парламентдин вице-спикер Юрий Левицкийди, Энрик Муслимовди, Дербент шагьрин главайин заместитель Видади Зейналовди, Дербент райондин глава Мавсум Рягьимовди ва жарадари чпин улхбариъ баяр-шубариз чухсагъул мялум гъапIнийи, республикайин гележег гъийин отличникарикан асиллу вуйиваликан гъапнийи.
Слетдиъ иштирак гъахьи мектебариъ урхурайи отличникарикан жаради дупну ккунду. Магьа Табасаран ва Хив районариан слетдиъ иштирак гъахьи отличникар ччвурар: Табасаран райондин Хянягъ гъулан СОШ-диъ урхурайи Мурад Къурбанов, «Табасаран райондин гимназия» МКОУ-йиъ урхурайи Марият Рашидова, Дарвагъ гъулан 1-пи нумрайин СОШ-диъ урхурайи Залина Мягьрамова, Акъа гъулан СОШ-диъ урхурайи Марат Рамазанов, СиртIич гъулан СОШ-диъ урхурайи Сяид Шихбабаев, Хив райондин Хив гъулан СОШ-диъ урхурайи Ишира Гьясратова, Асият Ярметова ва Нажмудин Жяфаров, Гашан-гъулан мектебдиъ урхурайи Амина Фятялиева, ЗахитI гъулан СОШ-диъ урхурайи Снежанна Межидова.
Дербент райондин терефнаан слетдиз теклиф дапIнайи отличникарин арайиъ КIежюх гъулан мектебдин 11-пи классдиъ урхурайи Залина Гьяжибаевара айи. Узу дугъан дада Элина Гьяжибаевайихъди телефондиан сюгьбат гъубхнийза.
«Дербент райондиан 5, хъа Дербент шагьриан 10 отличник слетдиз гъядягънийи. Гьадрарин арайиъ ич ришра айи. Слетдиз баяр-шубарин абйир-бабаризра теклиф дапIнайи. Дербентдиъ лезги театриъ серенжем лап утканди кIули гъубшнийи. Слетдин дахилнаъди концерт улупнийи, викторина гъубхнийи, хялар аьхю гьюрматниинди кьабул гъапIнийи. Пулин пешкешар ва образованиейин министерствойин терефнаан грамотйир тувнийи. Саб гафниинди, серенжем тешкил гъапIдариз чухсагъул мялум апIуз ккундузуз, гьамцдар серенжемари мектебариъ ужуди урхурайидарин рюгьнак хъана артухъ гьевес капIру», – гъапнийи Элина Гьяжибаевайи.
Слетдин дахилнаъди шубуб номинацияйиъ мялимаризра хусуси метлеб айи пешкешар тувну. «ВаритIан гизаф йисари гъилиху мялим» номинацияйиъ СтIал Сулейман райондин ЦIийи поселокдин СОШ-дин мялим Тельман Гъаниев, «Бабан чIалнан варитIан жигьил мялим» номинацияйиъ Дербент шагьрин 11-пи нумрайин мектебдин табасаран чIалнан мялим Мадина Ханмягьямедова, «Кьибла Дагъустандин варитIан цIиб вуйи халкьдин бабан чIалнан мялим» номинацияйиъ Рутул райондин Мишлеш гъулан мектебдин цIахур чIалнан мялим гъалиб гъахьнийи.
Серенжемдин аьхириъ слетдиз дуфнайи отличникарин арайиъ «Кьибла Дагъустандин культурайин код» темайиан викторина кIули гъубшнийи. Викторинайин дахилнаъди Кьибла Дагъустандин халкьарин тарихдикан, культурайикан суалар тувнийи. Табасаран райондиан дуфнайи баяр-шубари викторинайиъ сабпи йишв гъибисну. Гъалибчйириз серенжемдин тешкилатчйирин терефнаан аьлава пешкешар ва премийир тувнийи.
«Кьибла Дагъустандин жигьиларин союз» ДРОО-йин командайи пулин кюмек туву меценат Мамед Аьбасовдиз ва серенжем тешкил апIбаъ иштирак гъахьидариз варидариз чухсагъул мялум гъапIнийи.
