Мейлан Нежефов
Дагъустанлуйир ихь Ватандин жюрбежюр пIипIариъ яшамиш шула. Вари миллетарихъди албагну яшамиш хьуз ккуни ихь табасаранарра адру йишв адаршул. Жвувандарихьнаси, жара халкьарин аьдатарихьнара гьюрматлуди илтIикIури, уж’валин тумар урзури гъахьиш, яд юрдариканра багъри ватан шул.
«Табасарандин нурар» газатдин 29-пи нумрайиъ учу, Ватандин Аьхю дявдин кьяляхъ, читинвалар себеб духьну, багъри гъулхьан ярхла гъахьи Фейзулла Къазимягьямадовдикан макьала тувнийча.
Гъийин макьалайиъ ич мухбир Мейлан Нежефовди газат урхурайидар Хив райондин Зилдикк гъулаъ бабкан гъахьи дугъан чве Жаруллагь Къазимягьямадовдихъди таниш апIура ктибтуз ккундузуз. Жаруллагь Маллаевич Къазимягьямадов 1935-пи йисан 25-пи ноябри бабкан гъахьну. Аьгъюваларихъ юкIв хъайи бали чан багъри гъулан 7 йисандин мектеб ужудар аьгъювалариинди ккудубкIуру. КIваин апIурхьа: дугъаз Фейзуллагьна Фейтуллагь кIуру учвтIан аьхю чвйирра ади гъахьну. Хъа айи сар чи лап бицIи яшнаъди кечмиш гъахьну.
Адашна дада ухди уьмриан гъушиган, дявдин кьяляхъна йисари Жаруллагь ва Фейтуллагь чпин аьхюну чве Фейзуллагьди чахьна Бакуйиз хъади гъягъюру. Душваъ Жаруллагьди мореходный мектебдиъ урхуз хъюгъру. Урхуб ккудубкIган, жигьил бай теплоходдиъ ляхниъ учIвру.
Заан образованиейикан фикрар апIурайи жигьил 1962-пи йисан жвуван ватандиз хъадакну дуфну, Дагъустандин гьюкуматдин университетдин филологияйин факультетдик урхуз кучIвру. Ужудар аьгъювалариинди урхуб ккудубкIнайи пишекриз дагълу гъуларикан саб гъулан мектебдиъ ляхин апIуб теклиф апIуру, амма думу Кафари Осетияйин Моздокский райондин Ново-Осетинская кIуру станицайиз удучIвну гъягъюру.
1966-пи йисан 20-пи авгъустди Жаруллагьди Алла кIуру осетин шурахъди хизан ккебгъру. Албагну яшамиш шулайи жигьил хизандиъ сарпир вуди бай, хъасин риш бабкан шулу.
1967-пи йислан 1978-пи йисазкьан Жаруллагьди урус чIалнанна литературайин дарсар киври, мектебдин завучдин, хъа саб вахтна директорин вазифйирра кIули гъахури, лайикьлу зегьмет зигури гъахьну.
1980-пи йисхъанмина пенсияйиз удучIвайиз «Газообменный пункт» кIуру тешкилатдин заведующийди гъилихну. Наан лихури гъахьнушра, чан ляхин ужуди тешкил апIуз, гъарашугъарихъди албагну яшамиш хьуз аьгъю ихь ватанагьлийин гьарсаб ляхниъ ужудар хъуркьувалар ади гъахьну.
1971-пи йисхъанмина Ново-Осетинская станицайин бицIидарин багъдиъ тербиячиди лихурайи Алла Борисовна 1978-пи йисхъан 1987-пи йисазкьан му бицIидарин багъдин заведующийдин вазифйир кIули гъахури гъахьну.
Жаруллагь бай Борис Къазимягья-мадовди, милицийин гъуллугъчи (майор) вуйи ва 32 йис тамам дубхьнайи вахтна ляхниъ чан вазифйир тамам апIурайи вахтна вахтсузди гъакIну. Борисдин риш Тамарайиз гъи шубур велед а. Жаруллагьдин риш Гульнарайиз – кьюр ришна сар хтул а.
«Ич адаш гизаф ужур, гъянир, инсанарин арайиъ гьюрмат айи кас вуйи. Думу гьар вахтна хизандин гъайгъушнаъ шуйи. Дустарихъди, гъуландарихъди ужудар аьлакьйир уьрхюри, гьар вахтна багъри ватанра кIваъ ади яшамиш шули гъахьну. Багахьлуйир имдруган, адаш Дагъустандиз гъягъюри шулдайи, амма гьарган кIваин апIури шуйи, ва дугъан багъри ругарихьна вуйи мани гьиссар гъудургундайи», – гьамци кIура Жаруллагь Маллаевичдин шуру чан адашикан.
Жвуван гъардшарихъдира ужудар аьлакьйир ади яшамиш шули гъахьи Жаруллагь Къазимягьямадов 2005-пи йисан 3-пи феврали кечмиш гъахьну. Ихь ватанагьли кIваин апIури, дугъан шураз, худлариз уьмриъ ужувлар, хъуркьувалар ккун апIурхьа.
