Зубайдат Шябанова
Гьаму йигъари Гъяйтагъ райондиъ Сурхачи гъулан мектебдин бинайиин кIули гъушу Гъалибвалин 81 йисаз ва Дагъустандин гъулан мяишатдин лайикьлу гъуллугъчи Рамазанкьади Юсупов кIваин уьрхбаз бахш дапIнайи волейболин талитариъ Табасаран райондин шубарин волейболин командайи пешкешнан йишв гъадабгъну.
Талитариъ Табасаран, Дахадаев ва Гъяйтагъ районариан 11-17 йисариъ айи шубарин 5 команда иштирак гъахьну. Табасаран райондин командайиъ айидар ТIивак гъулан мектебдин 9-11-пи классариъ урхурайи шубар вуйи.
Вари командйири чпи талитарихьна бегьемди гьязур духьнайиб, гъалибвалихьна аьшкь ва командйирин арайиъ сабвал айиб улупну. Хъа тамаша апIуз дуфнайидар ва спортсменар маракьлу талитарикан лапра разиди гъузну.
Талитарин натижйириинди сабпи йишв Сурхачи гъулан мектебдин, кьюбпи йишв Мажлис гъулан мектебдин ва шубубпи йишв ТIивак гъулан мектебдин командйири гъазанмиш гъапIну.
Приздин йишвар гъадагъдар кубокариинди, медалариинди ва пулин пешкешариинди лишанлу гъапIну.
Ич сюгьбатнаъ Табаса-ран райондин бицIидаринна живанарин спортдин 3-пи нумрайин мектебдин директор Садикь Уьсмановди къайд гъапIганси, ТIивак гъулан командайин дахилнаъ айи шубар талитарихьна бегьем гьязурди айи. Думу команда швнуб-сабан Хючна гъулаз, райондин шубарин сборный командайихъдира талитар гъахури, спортдин мектебдиз гъюри гъахьну. Гьяйифки, волейбол уйнамиш апIбан ужудар вердиш’валар ва тажруба айи кьюр шурхьан талитариз гъягъюз гъабхьундар.
«Пуз ккундузузки, дарги халкьди фицдар вушра талитар бегьем гьязурлугвал ади, аьхю машкварси кIули гъахуру. Магьа гьаму талитаризра дурари призовой фонддиз саб миллион манат жара гъапIну. Яна, сабпи йишваз – 500 агъзур манат, кьюбпи йишваз – 300 агъзур манат ва шубубпи йишв гъадабгъдариз 200 агъзур манат тувну. Мидланра гъайри, командйир хъади гъафи тренераризра хьу-хьуцIур агъзур манат жара гъапIнийи. Гьацира талитар ккергъайиз концертдин программа улупну, ва талитариз лигуз гизаф кьадар тамашачйир гъафну.
Дюзди гъапиш, талитариз узу ТIивак гъулан шубарин командайихъди мектебдин мялим-тренер гьаънийза. Думу шубар гьаму жюрейин талитариъ иштирак шули ва жара районариз гъягъюри сабпи раж вуйи. Душваъ тамашачйирин командайихьна вуйи фикир ва чпин райондихъан юкIв убгурайивал гъябкъиган, ихь шубар цIиб мюгьталра гъахьнийи. Мицдар дюшюшариъ, икибаштIан, талитариъ кми-кмиди иштирак шулайи командйиринра рюгь ккабгъру. Гьаддиз ихь шубарихьан шубубпи йишвтIан гъазанмиш апIуз гъабхьундар. Хъа, гьаци вушра, узуз талитариан швнур-сари зенг апIури, шубари маракьлу ва гужли талит гъабхурайиваликан мялумат туври гъахьну. Узу дурарин натижайиин рази вуза. Машаллагь шубариз», – гъапну Садикь Уьсмановди.
