Наргиз Гюлечова
Гъулан мяишат… Му гаф гъеебхьубси, узу бицIидиган, ич адашгъяри йицар ккитIну, йицарикк дуруц ккибтIну, сар касди йицарин улхьан хьади, хъа тмунури жилик кипнайи дурцихъан дибисну, хутIлар хъаърайи йиз варитIан ужудар вахтар кIваин шулийиз. ХутIлариъ мягьсулар дурзну, игнар-гадар дапIну, тахил ккадабцIурайи вахтар гъира, накь гъахьи гьядисйирси, кIваин илмийиз. Хъа гьяйифки, думу аьдатар имдар.
Гьадрарихъди сабси, инсанари чпин хутIлариъ мягьсулар урзувалра ккубтIну.
Вушра, гъи Дагъустандин улихь-кIулихь хьайидари гъулан мяишатдин циркил артмиш апIуз артухъдиси мумкинвалар агури, миллиардариинди багъманчивализ ва пеэр-шюхъярин цирклариз инвестицйир жалб апIура. Гьаддиз, йигълан-йигъаз киврайи йимишаринси, тIумтIин багъларинра кьадар артухъ шула, дюгю гьясил апIувал улихь гъябгъюра, мал-къара уьбхювал артмиш шула. Гьаддихъси сабси, гьамусяаьт республикайин АПК-йиъ хайлин жара инвестицйирин проектарра уьмриз кечирмиш апIура, ва думу проектар юрутмиш, лихру йишварра ачмиш шула. Мисал вуди гъадабгъиш, ккудубшу йисан Хив райондиъ никкдин сурсатар гьясил апIру кархана ачмиш гъапIну. Душваъ хайлин инсанариз лихру йишвар гъахьну. Цирклиъ ляхин апIру касар цIибтIан адар, гьаз гъапиш мектеб ккудукIбалан кьяляхъ, гъулан мяишатдин гъуллугъчйирин пишекарвалиан лазим вуйи, думу терефнаан аьгъювалар гъадагъну лап цIиб ву.
Улихьнаси Урусатдин Президент Владимир Путиндихъди вуйи сюгьбатнаъ Дагъустандин Глава Сергей Меликовдира, республикайин гъулан мяишатдикан ва думу атрмиш апIуз агурайи рякъярикан гъапну. Гъи гъулан мяишатдин ва душваъ лихурайи касарин эгьемиятлуваликан гьамдира шагьидвал апIура.
Узу гъубшу гьяфтайи Буйнакск шагьриъ Ш. Шихсяидовдин ччвурнахъ хъайи гъулан мяишатдин пишекрар гьязур апIурайи колледждиз гъушиган, душваъ пишекрар гьязур апIбан бадали гъахурайи ляхнар дяркъну, мюгьтал гъахьунзу. Студентари чпи кадагънайи пишйириан аьгъювалар гъадагъбан бадали, колледждин дирекцияйи дурар варибдихъди тямин дапIна. Мисал вуди гъадабгъиш, душваъ урхурайидарикан набататчивалин цирклиъ техникайихъди ляхнар апIру пишекрар, гъулан мяишатдиъ лихурайи машинарна тракторар рас апIру, дурарихъ хъитIру алатар ишлетмиш апIру, мал духтур шлу, малдарвалин ва арфар уьрхру пишекрар шула. Колледждиъ урхбахъди сабси, тажрубайин ляхнарра гъахура, ва гьарсар студентди дарснаъ чав гъадагъу аьгъювалар дишлади тажрубайиъ ишлетмиш апIура. Думу ляхин гъабхбан бадали, колледждиъ 100 аьдадтIан артухъ гъулан мяишатдиъ ишлетмиш апIурайи техника а.
Милданра гъайри, мал-духтирвалин факультетдиъ урхурайидариз ветеринарияйин тяди кюмекнан машинра а, ва студентари, гьадму машиндиъди дих гъапIу йишвазра гъягъюри, мал-къарайиз, хулан гьяйванатариз духтирвалин кюмек тувра.
Колледждиъ гьацира кондитервалинна кьасабарвалин пишекрарра гьязур апIура. Пуз ккундузузки, мушваъ лап цIиб вушра, Табасаран райондиан вуйи баяр-шубарира аьгъювалар гъадагъурайи.
Республикайин гъулан мяишат артмиш апIбан бадали ужудар пишекрар гьязур апIурайи му колледждиз гьюкуматдин терефнаанра кюмек а. 3-4 йис улихьна 100 миллион манатдин грант гъадабгъну, гьаддин кюмекниинди гьаму деврин технологияйин цIийи комбайнра масу гъадабгъна, ва студентари гьаддихъди хутIлариъ ляхин апIури, пишекарвалин тажруба гъабхура. 2024-пи йисхъанмина башламиш дапIну, гъулариъ айи мектебариъ гъулан мяишатдикан яркьуди мялуматар тувру агроклассар ачмиш апIуз хъюгъна. Гъийин йигъаз дицдар 50 класс ачмиш дапIна, ва 2030-пи йисаз дурарин кьадар 500-диина алдапIуз планариъ а. Гьаму ляхинра гъулан мяишатдин пишекрар гьязур апIбаз туврайи саб аьхю кюмек ву.
