Наргиз Гюлечова

ЦIийи йисан Дагъустандин РИА-йин конференцйир гъахру залиъ кIули гъубшу сабпи пресс-конференция, яшайишдин ва коммунальный шараитариз бахш дапIнайиб вуйи. Мина 2025-пи йисан кIули гъуху ляхнарин натижйирикан ва гьаму йисаз дивнайи планарикан ктибтури, Дагъустандин Гьюкуматдин жилищный инспекцияйин (ГЖИ) кIулиъ айирин вазифйир вахтназ вуди тамам апIурайи Арсен Гьяжиев ва дугъан заместитель Мавра Пакалов дуфнайи.

Конференция ачмиш апIури Арсен Гьяжиевди мялум гъапIганси, ккудубшу йисан республикайин ГЖИ-йиз агьалйирихьан гъафи аьрзйирикан 4029 аьрзйириз гъилигну ва дурар гьял гъапIну. Дуфнайи аьрзйир ахтармиш апIури, ашкар гъахьи 4237 тахсиркарваларикан 1086 тахсир гьял апIуз теклифар дивну ва жавабдар касарин ва гъуллугъарин 5 миллионна 900 агъзур манаттIан артухъ журумар гъапIну. ГЖИ-йиз гъафи аьрзйирикан асас пай, агьалйирихьна рубкьурайи штун ва электричествойин ери ужуб дарубдикан вуйи.

«Цирклиъ алахьурайи читинваларин ва агьалйирихьан гъюрайи аьрзйирин кьадар гизаф вушра, дурарикан 90% мянфяаьтлуди гьял апIура. Хъа гъузрайидар, йисариинди гьял дарапIди айи читин меселйир ву. Гьацдар меселйир гьял апIувал улихь дивнайи метлеб вуйич», – гъапну Арсен Гьяжиевди.

Макьала яркьуди гъюру нумрайиъ чап апIидича