Мейлан Нежефов

Улихьна йигъари Хив райондин Гъвандккарин кьялан мектебдин цалик ихь закурин ислягь уьмур бадали СВО-йиъ талаф гъахьи Руслан Рамазановдин (шиклиъ) сурат кайи мармардашдин гъван кебхнийи.

 

Русландин арха Гъванккарин гъул’ан ву. Хъа думу учв Томск шагьриъ бабкан гъахьну. Му хажалатнан ва гьюрмат уьбхбан серенжемдиъ гъулан агьалйир, мектебдин мялимар ва урхурайидар, балин дада Насият Рамазанова, райондин кIулиъ айи Ярмет Ярметов, Хив ва Агъул районарин военный комиссар Сулейман Гьюсейнов, кьягьялин ярар-дустар ва багъридар иштирак гъахьнийи.

Серенжем абццри, райондин главайи 22 йисандин яшариъ айи Русландин игитваликан тярифниинди ктибтнийи.
«Гъи ухьу уч духьнайи гьюрмат уьбхбан серенжем, игитар ихь арайиъра айибдикан хабар туврайиб ву. Гьаму мектеб чан ччвурнахъ хъайи шаир ва эскер Б. Митаровди гъапиганси,

Якьинди кIурхьа, аьгъяхьуз,
Аьсрариъ дарчIиди гъузру
Дявдиз гъушу Ватан уьбхюз
Игитар, чпин жанар туву.

Ав, му гафар тасдикь апIури пуз ккундузузки, ихь Русландин ччвурра гьацдар игитарин дестейин тарихнаъ бикIурхьа. Бализ мициб ватанпервервалин тербия туву дадайизра аферин. Ихь уьлкейин кIулиъ айи Владимир Путиндин къарарниинди Руслан «Дирбаш’вализ лигну» медалиинди ва Кьягьялвалин ордендиинди лишанлу дапIна. Ухьуз думу гьарган нумуна вуди, ихь фикриъ марцциди ва чIивирди гъузди» – гъапнийи чан улхбаъ Ярмет Ярметовди.

Гъвандккарин кьялан мектебдин директор Рамазан Шябановди чан улхбаъ тарихнан дарсариъ Руслан Рамазановдин ччвур гьарган кIваин хури гъибтуб лазим вуйивал къайд гъапIнийи. Урхурайидари Расул Гьямзатовдин «Кьарнийир» шиъриан урус ва табасаран чIалариинди бендар кIваъланди гъурхнийи. Хъасин серенжемдин иштиракчйири мармардашдин гъвандин улихь кюкйир дивнийи ва вари игитрин рюгьназ бахш вуди, саб дакьикьайин арайиъ ккебехъну гъузнийи.

Серенжемдин аьхириъ балин дадайи чпин хизан-кюлфетдин хажалат чпихъди сабси пай апIурайидариз чухсагъул мялум гъапIнийи.