Мейлан Нежефов
«Табасарандин нурар» газатдин машариъ учу «Хусуси метлеб айи дявдин операция» рубрикайиккди туврайи макьалйириъ гьар гьяфтайиъ газат урхурайидар, ата-бабйирин васият тамам апIури, жвуван ватан ва халкь бадали жан гьяйиф дарди душмниз къаршуди удучIвнайи табасаран игитарихъди таниш апIурача. Гьяйифки, дявдин чюлиъ уьмриан гъушу кьягьяларин гъамлу сиягь йигълан-йигъаз ярхи шула.
Гъийин йиз макьала гьаму игит наслин вакил, жил’ин ислягьвал ккунди ва гьякь’вал йишв’ина хуз ният ади талаф гъахьи Ильгьам Гьясановдикан ву.Ильгьам Пирмурадович Гьясанов 1985-пи йисан 15-пи апрелиъ Хив райондин ЦIудухъ гъулаъ Пирмурад ва Лейла Гьясановарин хизандиъ бабкан гъахьну. Халис табасаран хизандиз гъулаъ ужуб гьякь-гьюрмат а. Гьяйифки, адаш уьмриан ухди гъушну, амма баяриз къурхулувал гъябкъюндар. Дадайи юкьур велед баркаллагьниинди дюрхну арайиз адагъну.
Багъри гъулан 9-пи классдиина вуйи мектеб ккудубкIбалан кьяляхъ, Ильгьам, 2001-пи йисан бухгалтервалин пишекарвалин рякъ кадабгъну, ДГСХА-йик урхуз кучIвру, ва вахт улдубчIвган дугъу ужудар натижйириинди вуз ккудубкIуру.
2006-пи йисан Илгьам Гьясанов армияйиз гъягъюру ва, эскервалин буржи тамам апIури имиди, военный контракт йибтIуру. Гьаци, 2006-пи йислан 2010-пи йис’ина гъяйиз дугъу 61-пи бригадайин гьюлин пияда кьушмариъ авчивалин вазифйир кIули гъахури, десантдинна гьюжум апIбан батальондиъ гъуллугъ апIури гъахьну.
СВО ккебгъбан себебари ва дидин улихь дивнайи метлебари чан уьмрин юлдаш Аида Рамазановнайихъди шубур велед тербияламиш апIурайи Ильгьамдин кIваз аьхю тясир тувнийи. Ихь уьлкейиъ тамам дару мобилизация ккебгъиган, учв Украинайиз гъягъюб чан асас буржи ва фикир дапIну, адабгънайи мясляаьт вуйивалин хизанар ва багахьлуйир гъаврикк ккаъну, Илгьам чан хушниинди дина гъушнийи.
2022-пи йисан сентябрин вазлилан 2023-пи йисан майдин вазлиз Ильгьам Гьясановди «ЧВК Вагнер» дестейин гьюжум апIру взводдин командирин вазифйир кIули гъахури гъахьну. 2023-пи йисан 11-пи майдиъ думу Донецк Халкьдин Республикайин Артёмовск шагьрин багахь гъахьи женгнаъ аьхю зийнариан талаф гъахьну. Игит багъри гъулаз духну чан гьаммишандиз вуйи аьхиратдин хулаъ сикин гъапIнийи.
Урусатдин Президент Владимир Путиндин къарарниинди Ильгьам Кьягьялвалин ордендиинди ва жара гьацдар медалариинди лишанлу дапIна. Уьмриан гъушнушра, чав улупу жюрэтлували думу гьаргандиз ихь фикриъ ва гьацира аргъаж шулайи наслариз нумунади гъузди. Гьаци вуйивал ЦIудхъарин тамам дару мектебдиз дугъан ччвур тувбан гьякьнаан Хив райондин собраниейин депутатари гъубшу гьяфтайиъ адабгъу къарарнура субут апIура.
Ильгьамди чан жикъи уьмур кьягьяларин кIакIнаъ ади хъапIну. Инсанар игитар вуди бабкан даршлуб ва дурар, дугъриданра, гьамци уьмри арайиз хруб сабсан ражну дугъу чан жикъи амма аку уьмриинди тасдикь гъапIну.
