Мейлан Нежефов
Хив райондин мектебариъ заан классариъ урхурайи баяр-шубариз гьаму гьяфтайиъ кьягьялвалин дарсар кивну.

 

Дарсариз асас вуди ухьуз варидиз нумуна гъахьи «Лихай, чвйир» тема гъадабгънийи. Эгер ихь арайиъ му гафарин автор, Урусатдин Игит, полицияйин лейтенант Мягьямад Нурбагьандов чIивиди имийиш, 9-пи январи дугъан 39 йис тамам шулийи. Гьяйифки, дугъан уьмур ужудар чагълариъ айи вахтна 2016-пи йисан инсафсузари кьатI гъапIну.

Игит ихь арайиан душну, саки миржид йис шула. Амма яракь унтI’ин алапIнайи душмнин улариз гучI дарди лигурайи мютIюгъ дархьи Мягьямаддин сурат гьаргандиз ихь уларикк гъубзди.
Дугъан «Лихай, чвйир» кIуру гафари гъи Украинайиъ хусуси метлеб айи операцияйиъ гьунарар улупурайи, дагълу ифи дамариъ либхурайи баярик хлинццар кивра ва, дурари Нурбагьандовдин дихназ «Лихурача, гъардаш» кIуру жавабар туври, жюрэтлувал улупура.

Тамам 40 дакьикьайин дарснаъ урхурайидар дугъан уьмрикан вуйи видеороликариз гъилигнийи, дурари игитриз бахш дапIнайи макьалйир, шиърар гъурхнийи.
Дупну ккундуки, дарс кIули гъюбхбан натижайиъ урхурайидар нубатнан ражну Игитар ихь арайиъ айибдин гъавриъ гъахьну. Мялимари дарсарин улихь дивнайи ватанпервервалин метлебар кIулиз адагънийи. Аьхириъ баяр-шубар ва мялимар, эскервалин гъуллугъ тамам апIури гъийиху эскрарин гььюрмат уьбхюри, саб дакьикьайин арайиъ ккебехъну гъузнийи.