Зубайдат Шябанова
Майдин 5-пи йигъан Табасаран райондин администрацияйиъ, аьхю мархьар ургъбан натижайиъ зарар гъабхьи Мягьрягъ, ГьепIил, ЖагътIил ва ТIюрягъ гъуларин 14 хизандиз Урусатдин жюрбежюр шагьрариъ ва гъулариъ яшамиш шулайи табасаран ватандашарихьан вуйи рягьимлувалин кюмек тувбан серенжем кIули гъубшну.
Серенжемдин эвелиъ райондин глава Мягьямед Къурбановди къайд гъапIганси, къанундиинди табиаьтдин завалиъ ахьдариз гьюкуматдин терефнаан вуйи кюмек анжагъ чарасуз аьгьвалатнан къайда мялум гъапIхъантIан тувудар. Табасаран райондиъ думу режим мялум гъапIундар, фицики ГО-йин ва ЧС-дин отделин кIулиъ айи Сефербег Сефербеговдин гафариинди, гъагъи аьгьвалатнан режим мялум апIбан чарасузвал гъабхьундар. Райондиъ заан гьязурлугвалин къайда гьяракатнаъ гъубзра.
Муниципалитетдин кIулиъ айири мялум гъапIганси, штари пуч гъапIу хайлин хуларин эйсйириз, хуларинси, жилинра хусусивал тасдикь апIурайи кагъзар адайи. Му дюшюшариъ дурариз кюмек рягьимлувалин фондариан ва агьалйирин терефнаан вуйи дакьатариан тувди.
«Райондин администрацияйиз гьар йигъан табиаьтдин завалиъ ахьдарихьан цIийи аьрзйир гъюра. Дурариз кюмек тувру вари рякъяр агуз чалашмиш хьидихьа. Вари аьрзйириз лигиди, комиссия вари адресариз гъягъюру. Мидиз вахт лазим ву. Пулин кюмек райондиз гъюри ими. Му ляхник баркаллу пай киврайи гьарсар ватандашдиз чухсагъул пуз ккундузуз», – гъапну райондин главайи.
Мягьямед Къурбановди къайд гъапIганси, гьаму йигъари завалиъ ахьдариз пулин кюмек райондин ватандашарихьан гъафну. «Газпром межрегионгаз Махачкала» ООО-йин генеральный директор Ризван Мурадовди 200 агъзур манат хътапIну, «Табасарандин РЭС» идарайин гъуллугъчйири 100 агъзур манат тувну, райондин агьалйирин яшайишдин игьтияжар гьуркIру комплексный центрин вакилари 130 агъзур манат уч гъапIну, хъа газран гъуллугънан цирклиъ лихурайидари 50 агъзур манат тувну. Табасаран дишагьлйирин союздин тешкилатдин счетдизра финансарин кюмек хътапIурайидар а.
Мягьямед Къурбановди гьацира мархьари пуч гъапIу хуларин эйсйирихьна комиссияйин вакилар гъягъюри имбуваликан ва му ляхниъ учв райондин депутатарин, гъуларин имамарин ва жямяаьтлугъдин терефнаан кюмекназ ккилигурайиваликан гъапну.
Эгер мархьар ургъувал давам шули, аьгьвалат гъагъи гъабхьиш, бедбахтвалиъ ахьдариз гостиницайин номерар жара апIуз ва дурар ипIрубдихъди тямин апIуз вари мумкинвалар дагна.
