Наргиз Гюлечова
Дагъустан табиаьтдин заваликк ккабхъхъанмина саки саб ваз дубхьна. Гьаму вахтнан арайиъ ихь ватандин хайлин регионариан республикайиз кюмек апIуз фукьан вушра инсанар гъафну. Шид улубчIвбан, жилар кучвурхбан натижйир арайиан адагъбан бадали, хилариинди апIурайи кюмекси, пулин кюмек тувдарин кьадарра цIиб дар. Хъа вушра гьюкуматдин терефнаан вуйи кюмек читин гьялнаъ айи касарихьна гьелелиг бегьемди дурубкьнадар. Чарасуз вуйи аьгьвалатнакк (ЧС) ккахьу районариъ яшамиш шулайи касариз сабпи нубатнаъди тувну ккуни 15 агъзур манаткьан саспидарихьна дурубкьнадар. Инсанари кюмек ккун апIури дикIурайи аьрзйир гьаз кьабул апIурадарш ктибтури, гьаму йигъари Дагъустандиъ айи МЧС-дин КIулин управлениейин начальникдин заместитель Сабир Мягьмудов ва отделин начальник Ислам Ибрагьимов журналистарихъди гюрюшмиш гъахьну.
Ислам Ибрагьимовди, зарар дубхьнайи касари «Госуслуги» порталиан аьрзйир тувбан кьяляхъ, дурариз компенсация тувбаз «ваъ» гьаз кIураш, ктибтнийи. Дугъан гафариинди, аьрза туврайи касари варитIан гизафси деебтурайи гъалатI, гьадму вуки, прописка дапIнайи йишвна чпи яшамиш шулайи йишв дурар саб вуйибси улупура, гьякьикьатди дурар жа-жарадар вушра. Хъа прописка дапIнайи йишв ЧС дубхьнайи аьтрафарик ктрабхъди хьуб мумкин ву, гьаддиз дурарин аьрзйир кьабул апIурадар.
«Саспи касарин чпи яшамиш шулайи хуларин эйсйир вуйиб тасдикь апIурайи кагъзар бегьем гьуркIну адар. Гьаддиз гьюкуматдикан кюмек ккун апIури аьрза тувру вахтна, асас фикир жвув яшамиш шулайи адресназ тувну ккунду. Эгер «Госуслуги» порталиан кюмек ккун апIури тувнайи аьрзайиз «ваъ» кIуру жаваб гъафиш, МФЦ-йиз илтIикIну ккунду. Республикайин МФЦ-йин «горячий линияйиз» (88722 666-999) зенг гъапIиган, аьрза фу жюрейиинди тувну ккундуш, дурарира гъаврикк ккаъру. Саб гафниинди, му ляхнихьна лап жавабдарвалиинди янашмиш духьну ккунду. Гъи, хал-девлет пуч дубхьну, гьюкуматдикан кюмек ккун апIури илтIикIурайи касариз МЧС-ди кюмекра тувра: зарар гъабхьи касарин сиягьар ЧС мялум гъапIу йигъланмина уч апIура. Чарасуз вуйи аьгьвалат мялум дапIнайи муниципалитетариъ ерли органари тешкил дапIнайи комиссйири, гьарсарин хулаз гъягъюри, дубхьнайи зарар бикIури, актар гьязур апIура. Саспи муниципалитетарин администрацйир, зарар гъабхьи касари аьрзйир тувайиз ккилилигди, дурариз чпи гьяракатниинди кюмек апIуз мажбур гъахьну», – гъапну Ислам Ибрагьимовди.
Сабир Мягьмудовди къайд гъапIганси, республикайиъ гужли мархьар-селлер ургъбан натижайиъ арайиз гъафи аьгьвалат федеральный дережайинуб ву, гьаддиз гьюкуматдин терефнаан вуйи кюмекра федеральный бюджетдиан жара дапIнайи дакьатарин гьисабнаан тувди.
Му кюмек ктарди, зарар гъабхьи касариз рягьимлувалин фондарира кюмек апIиди. Мисал вуди гъадабгъиш, «Надежда» рягьимлувалин фондну 1 миллиард манат пул уч апIура. Гьаци «Инсан», «Марцци юкIв» ва жара бицIи-бицIи фондарира пул уч апIура. Мидланра гъайри, завал дубхьну, читин гьялнаъ ахьнайи хайлин хизанариз машгьур блогерарира, пул уч апIури, думу рубкьура.
«Фондарихьан вуйи кюмек рубкьбан бадали, зарар хьувал гьюкуматдин комиссияйи тасдикь дапIнайи документар чарасуз лазим ву. Гьаддиз, документар вари уч дапIну гьязурди адрувализ лигну, фондари чпи уч апIурайи дакьатар зарар гъабхьи касариз пай апIуз гьелелиг хъюгъну адар», – гъапну Сабир Мягьмудовди.
Пресс-конференцияйиъ МЧС-дин вакилариз уч духьнайи журналистари суаларра тувнийи. ЧС-дик кипну адру Табасаран райондин агьалйириз дубхьнайи зарарнан гьякьнаан йиз суалназ жаваб туври Ислам Ибрагьимовди мялум гъапIганси, эгер район ЧС айи муниципалитетарин сиягьянаъ адарш, зарар гъабхьи касариз райондин администрацияйианси, муниципалитетдин фондарианра кюмек тувну ккунду.
Серенжемдин аьхириъ МЧС-дин вакилари, Дагъустандии улуркьу гъагъи йигъари республикайиз жара регионариан кюмекназ гъафи агьалйириз ва гьацира МЧС-дин гъуллугъчйирихъди сабси ватанагьлийириз хил гьачIабкку республикайин агьалйириз чухсагъул мялум гъапIнийи.
