Зубайдат Шябанова
Мартдин аьхириъ ва апрелин эвелариъ Дагъустандиз гъургъу аьхю мархьари республикайин хайлин аьдати ватандашарин яшайиш бинайиан дигиш гъапIну. Думу завалин натижайиъ республикайиз гъахьи бедбахтвалар гъира къайдайиз хуз удукьурадар. Варжариинди агьалйир хуларихьан, мал-къарайихьан, девлетнахьан, хъа бязидар багахьлуйирихьанра гъахьну.
Дагъустан Республикайиз Урусатдин жюрбежюр регионариан, машгьур блогерарихьан, жюрбежюр фондарихьан хайлин рягьимлувалин кюмек гъюра. Гъагъи аьгьвалатнаъ ахьу инсанариз кюмекназ чпин уч дапIнайиб гьяйиф дарди туврайи ватандашарра хайлин а.
БицIи кюмекчйир
Магьа саб видеороликдик Дербент шагьриан вуйи 7 йисаъ айи Флядин Алхасовди штун завалиъ ахьдариз чав уч дапIнайи пулин копилка тувра. Флядиндин гафариинди, мархь убгъури банд гьутIубччвну шид гъафи йишван думуна дугъан дада гвачIиндиз гъаахундайи.
«Узуз инсанаринра, гьяйванатаринра язухъди вузуз. Дурариз фтин кюмек апIуруш, аьгъдайзуз. Узу чекмийир алахьну, лапаткара, йиз уч дапIнайи пулра гъадабгъну, гъафунза. Амма узу бицIир ву кIури, деетудайи», – ктибтура бали.
Чпин кIваъ айи марцци хиялар апIбан бадали уч дапIнайи пул швнур-сар бицIири ва живанари рягьимлувалин кюмекназ тувну. Дурарин арайиъ Каспийск шагьриан вуйи бицIи табасаран риш Сафия Шябановара а. Сафия йиз чвуччвун риш ву. Дугъу гьамусмиди жарадарин дерд гьисс апIуз ва кюмек тувуз дубгъура. Хъа му инсанвалин варитIан аьхю лишан ву.
Эдеблувал
Хъа жара игит, 24 йисаъ айи Руслан Кандиев Мамедгъала поселокдиан ву. Думу хусуси метлеб айи дявдин операцияйиан лик ккадарди гъафир ву. Шид улубчIву садпи йигъланмина Русланди гъуландариз рягьимлувалин кюмек тувра. Шид гъафи вахтна дугъу хайлиндар штуан азад апIури, хъасин волонтерди лихури гъахьну.
Мамедгъала шагьриан вуйи Асият Бабаевайи чан чуччухъди сатIиди 14 йисаъ айи Шамиль Бягьямадялиевдиз рягьимлувалин кюмек тувру акция тешкил гъапIну. Ковиддин пандемияйиан Шамилин дада, хъа улихьна йисан хусуси метлеб айи дявдин операцияйиъ гъардаш кечмиш гъахьну. Гьамус шту дугъан халра жилихьди саб гъапIну. Багахьлуйирикан Шамилиз имбур сар халатIан дар. Думура жара райондиъ яшамиш шула.
Чухсагъул, гъуншйир
Гъунши юрдариан агьалйирра гъирагъдиъ гъузундар. Магьа Нальчикдиан вуйи сар жигьили, пул адарзуз кIури, рягьимлувалин акция тешкил дапIнайи йишвахьна чан мотоцикл хьади гъафну. Дугъаз учв ашкар апIуз ккун гъабхьундайи. Думу мотоцикл лап юкIв хъади гъадабгъуб вуйи, амма думу масу тувну, пул дагъустанлуйириз пай апIбан теклиф дивну. Гъийин йигъаз Нальчикдиан Дагъустандиз 10 ГАЗель ва кьюб фура рягьимлувалин кюмек дуфна. Инсанари гьеле кюмек хъана уч апIури ими.
Гьаддихъди сабси, Кафари Осетияйиан вуйи дилаварчйири ва аьдати касарира, рягьимлувалин акцйир тешкил апIури, ихь республикайиз кюмек хътапIура. Ариш-вериш гъабхурайи сар касди, чан ччвур ашкар дарапIуб ккун дапIну, Дагъустандиз саб тонна картфар ва гулйир хътаъну. Инсанари гьацира йимишар, мейвйир, ипIру сурсатар, алабхьру палат, пул хура.
Дагъустандиз машгьур касарин ва блогерарин терефнаан аьхю кюмек ади рябкъюрахьуз. Дурарин дих апIбарин кюмекниинди, жюрбежюр рягьимлувалин фондариз апрелин эвелариъ 600 миллионтIан артухъ пул уч гъабхьнийи. Мяълийирин устадар Бастайи (Василий Вакуленко) «Надежда» фонддиз саб миллион манат хъдапIну, Жасминди швнуб-саб хизандиз чав кюмек тувруваликан гъапну. Телеведущий Ида Галичди ва блогер Виктория Боняйи са-саб миллион манат хъдапIну. Гьаци кюмек апIурайи касарин кьадар аьхюб ву. Варидариз баркаллагь.
Дишагьлийин намус
Вари Дагъустан саб хизанси гъудужвну Мамедгъалайиз кюмек туврайи йигъари Табасаран райондин дишагьлийирин советдин председатель Айханум Рашидовайихьанра гъирагъдиъ гъузуз гъабхьундар. Дугъу швнуд-сад йигъан Мамедгъала поселокдиъ гъагъи аьгьвалатнаъ айидариз чахьан шлу кюмек апIури гъахьну.
«Мамедгъала поселокдиъ варитIан гъагъи гьялназ дуфнайи Заречная кючейин кIулиъ, сар касди чан гаражар марцц дапIну, чпин гъуландариз ва волонтерариз ипIруб гьивру йишв ккабалгну. Гьадушваъ садпи йигъхъанмина ихь меценат, «Табасарандин ватанперверар» дестейин регьбер Айваз Рамазановди ва Мурадяли Гъарахановди ипI-руб гьязур апIура. Думу йишваз, Мамедгъалайианси, багахь гъуларианра агьалйир, волонтерар, рягьимлувалин кюмек хьади гъюра. Сад-кьюд йигъан узу душваъ дурариз гьивуз-гьадабгъуз кюмек гъапIунза. ИкибаштIан, зарар гъабхьидарин арайиъ узуз таниш вуйи хизанарра гизаф а», – гъапну Айханум Рашидовайи.
Алаф гьубкIрадар
Къайд апIуз ккундузузки, республикайин Кафари ва Кьибла хайлин районариин ва шагьрариин штар улучIвнуш, дагълу районар саб метртIан ягъал йифари ккапIну. Гъунши Агъул райондиз йифарихьан марцц апIуз гьеле бегьемди кюмек дурубкьнадар. Мал-къарайиз ккабхьру алафра гьудрубкIрадар. Мидкан хабар гъабхьибси, Табасаран ва Хив районарин агьалйири чпин укI ва алаф дурариз кюмек вуди хътапIура.
Ярса гъулан агьалйири Агъул райондин Дулдугъ гъулаз кьюб ражари аьхю машинариъди укIан кипар хътаъну. Думу укIан кипар гъахуз Табасаран райондин администрацияйи ва Урусатдин райондиъ айи ОМВД-йин гъурулушди машинарин кюмек гъапIну. Хив райондин Гъвандикк ва жара гъуларианра аьхю машинариъди укIан кипар хътаъну. Игьтияжвал айидари чпира, Хив райондиз дуфну, пулсузди малариз ккабхьру ем ва алаф гъубхну.
