Зубайдат Шябанова

Табасаран райондин Рушвул гъулан 11-пи классдиъ урхурайи Аминат Гьяшимовайи литературайин ЕГЭ-йиан 100 бал гъазанмиш гъапIну.

«ЕГЭ-йихьна узу гьязур шули кьюд йискьан вуйиз. Шиърар кIваълан апIури, литературайин эсерар урхури гъахьунза. Дюзди гъапиш, узу 100 баллиз имтигьян тувру кIури, фикир дайиз. Му заан натижайиз сабпи нубатнаъди учуз литература киврайи мялим Гьяжиев Зиявудин Зейнудиновичдиз чухсагъул пуз ккундузуз. Му литературайихьна вуйи йиз аьшкьси, дугъан ляхнин натижара ву.
Ктабхъу йисан аьхириъ узу ЕГЭLAND онлайн-мектебдин марафондиъ иштирак хьуз йикьрар гъапIнийза ва швумалра гъахьундарза. Думу марафондиъ вари мялуматар, табшуругъар хъайи-хъайибси гьял апIуз, сочинение дюзди бикIуз улупура. Гьацира, йиз фикриан, литературайихьна вуйи йиз ккунивали аьхю роль уйнамиш гъапIну. Узуз, дугъриданна, му предмет дубгъуз аьшкь ади гъабхьунзуз. Хъа жвуваз хуш вуди тамам апIру фуну ляхниъра натижйир ужудар шулу, гьадму гьисабнаан аьгъювалар гъадагъбаъра», –

гъапнийи шуру.
Имтигьнар вари тувбан кьяляхъ Амина Гьяшимовайин филологияйин факультетдик кучIвуз ният а.